Икымше икшыве икымше лийын

Икымше икшыве икымше лийын

Тиде самырык мужыр Кристина ден Антон Изиляевмытын икымше икшывышт улмаш.

Аза Пўрӧ оласе роддомышто 2020 ий 26 декабрьыште 14 шагатат 20 минутышто шочын. Нелгытше 3 килограммат 15 грамм лийын, кугытшо – 51 сантиметр. Самырык-влак эргыштлан Василий лўмым пуэныт. Тиде грек лўм, Руш кугыжанышыш христиан йўла дене пырля толын. Марлаш кусараш гын, «кугыжа» лиеш.

Ардаш ялын шочшыжо Кристина Альбертовна ден Ӱлыл Шогертен ялын шочшыжо Антон Олегович 2020 ий 7 августышто мужыраҥыныт.

- Ме мыйын шочмо ялыштем илена. Идалык тўҥалтыште эргыланна шочмо кагазым налаш Мишканышке шке толынам. Тудет тений районыштына регистрироватлалтше икымше икшыве улмылан моткоч куаненна, - кумыл нӧлтын палдарыш пиалан ача.

Светлана ТОЙМУРЗИНА.