«А. Бик лудмаш-2020»

Пўрӧмучаш ялын шочшыжо марий писатель да поэт Анатолий Бикын (А. Бикмурзин) шочмыжлан 105 ий темме лўмешрайонысо школлаште тудын произведенийже-влакым лудмаш конкурс эртен

Мишкан районысо образований отделын приказше дене келшышын, «А. Бик лудмаш – 2020» 16 ноябрь гыч 13 декабрь марте онлайн йӧн дене эртен.

Конкурсым районысо образований отдел ден Пўрємучаш ялысе школ (Изи Накаряк ялысе кыдалаш школын филиалже) организоватленыт. Участник-влак ийгот шотышто кум тўшкалан шелылтыныт, усталыкышт 3 номинаций почеш тергалтын: поэзий, произведений гыч ужаш, А. Бикын мутшылан муро. Конкурсышто 100 утла тунемше ден 40 утла туныктышо участвоватленыт. Тунемше-влакын усталыкыштым посна жюри аклен, тушко «Келшымаш» газетын пашаеҥже-влак В. Абукаев ден В. Камилянов, краеведческий библиотекын пашаеҥже-влак О. Зайнитдинова ден И. Айбердина, марий историй да тўвыра рўдерын тўҥ специалистше А. Ибулаев, писательын шочшыжо И. Саметова, Мишкан районысо образований отделын специалистше А. Килинбаева пуреныт. Конкурсышто А. Бикын ятыр почеламутшо ден произведенийлаж гыч ужаш-влак йоҥгалтыныт. Жюри произведений-влакым лудмо усталыкым, оҥайлыкым, артист койышым, сценический культурым да кумылым савырен моштымым аклен. Сеҥыше ден призёр-влак Образований отдел МКУ-н грамотыж дене палемдалтыныт, участник-влак – сертификат-влак дене.

Сеҥыше ден участник-влакым чылаштымат алал кумылын саламлена! Йоча-влакым конкурслан ямдылыше туныктышо-влаклан тау мутым ойлена!

А. КИЛИНБАЕВА.