Таҥ тошкалын 50 ий пырля

Таҥ тошкалын 50 ий пырля

2019 ийыште тиде ялыште иканаште кум шӧртньӧ сӱан ыле. Тений Лариса Викторовна ден Ларион Яикбаевич Минилбаевмытын пиалан кечышт. Нуно икте-весыштым пагален, йєратен, икте-весыштлан эҥертен 50 ий илат. Лариса Викторовна ден Ларион Яикбаевич витле ий ончыч лач июнь тылзыште мужыраҥыныт.

Миндияров Ларион Яикбаевич Нерге ялыштак шочын-кушкын. Ешыштышт 6 икшыве лийын: 5 ӱдыр да ик эрге (йӧратыме, вучымо). Лӱмым тудлан ачажын Костя шольыжо пуэн. Сарыште кредалмыж годым командиржын лӱмжӧ лач Ларион лийын улмаш. Тудо Яикбай изамын эргыже тек фронтысо командирем гай чолга да чулым лийже манын.

Ларион Яикбаевич ондак Нерге ялысе тӱҥалтыш школышто тунемын, варажым Монар шымияш школышко пурен, тудым пытарымеке – Пӱрӧ оласе СПТУ-шко. Тушто механизаторлан тунемын, тракторист да шофер профессий-влакым налын. Тунем пытарымеке, шочмо ялышкыже пӧртылын да трактор дене пашам ышташ тӱҥалын. Ик жап гыч тудо армийыш каен. Крымыште служитлен, Армий гыч пӧртылмеке, уэшын тракторист лийын ыштен.

Ожно армий гыч служитлен пєртылшє рвезе-влакым родо-шочшышт унаш налыныт. Салтак пӧртылмӧ лӱмеш пайрем икмыняр кече шуйнен кертын. Йӱла тыгай улмаш.

Ик кастене армий гыч шукерте огыл пӧртылшӧ Ишпахтин Яковым Ефим изаже унаш ӱжын. Тушко ялысе чыла самырык еҥат миен. Лач тиде кастене Ларион Яикбаевич ик ӱдырым ужын. Тиде ӱдырым тудо ончычат ужын улмаш, поктен шуын палыме лияшат тыршен, но кенета йомдарен. Тиде кечын Ларион Яикбаевич чонжылан келшыше ўдырым ужатен каяш шонен пыштен да шонымыжым шуктен. Тиде кас гыч нуно таҥ лийыныт.

Лариса Викторовна Пекшек ялыште шочын-кушкын. Ешыштышт тудын 2 изаже да 2 шӱжарже лийыныт. Пекшек ялысе тӱҥалтыш школым тунем пытарымеке, Монар ялысе кандашияш школышто тунемын. Тулеч вара Благовещенск олаште бухгалтерлан тунем лектын. Профессийым налмеке, Нерге правленийыште тӱҥ бухгалтер лийын ыштен.

Таҥ лиймеке, Ларион Яикбаевич ден Лариса Викторовна икте-весыштым кажне кечын ужыныт: рвезе правленийыш кажне эрдене путевкылан пурен, кастене нуно икте-весыштым клубышто вученыт. Тыге ик ий эртен да 1970 ий 14 июньышто самырык-влак мужыраҥыныт.

Лариса Викторовна ден Ларион Яикбаевич 2 эргым – Эджан ден Анатолийым - ончен куштеныт. Ларион Яикбаевич Эджанлан армийыште пырля служитлыме йолташыжын лӱмжым пуэн.

Палемден кодыде ок лий: Анатолий эргышт Чечняште служитлен.

Шоҥго-влакым кызыт 5 уныкашт да ик кугезе уныкашт куандарат. Ик уныкашт кызыт Самара олаште служитла, вашке пєртылшаш улеш.

Кызыт Лариса Викторовна ден Ларион Яикбаевич коктын гына илат, но икшывыж ден шешкыже-влак эре унала толын да чыла пашамат шукташ полшен шогат.

Мучашлан, Монар сельсовет сельский поселенийысе уло ветеран-влак лӱм дене юбиляр-влакым саламлен, тыге каласыме шуэш:

Эр ӱжара гай волгыдо

лийже илышда,

Ӱстел йырда

погынышт чыла шочшыда,

Икшывыда-уныкада-влаклан куанен,

Пиал ден илыза йывыртен.

Мария ГАРЕЕВА, Монар сельсовет сельский поселенийысе ветеран-влак совет председатель.