Сутка мучко ыштыше стационар верч кучедалмаш умбакыже шуйна

Сутка мучко ыштыше стационар верч кучедалмаш умбакыже шуйна

Приемым Башкортостан Республикысе здравоохранений министр Максим Васильевич Забелин, БР-се 20 №-ан МСЭ ГБ ФКУ

бюрон председательже Валерий Валентинович Акбулатов, РФ РОПРЗ председатель Рауль Магруфович Халфин, ТФОМС-н Бирский филиалжын директоржо Тамара Ивановна Садыкова эртареныт.

Приемышто тыгак Мишкан район администраций вуйлатыше Павел Владимирович Трапезников, рӱдӧ районный больницын

тӱҥ врачше Ильдар Жанович Абзалтдинов, Чорай участковый больницын тӱҥ врачше Олег Ионович Семенов лийыныт. Приемыш 32 еҥ толын. Нуно инвалид группым налме, медицинский учрежденийлан оборудованийым пуымо, эмым ситарыме нерген

йодыш-влакым пуэныт. Но эн пӱсӧ йодыш, мутат уке, Чорай участковый больницым врачебный амбулаторийыш, вашке полыш станций дене, савырыме, сутка мучко ыштыше стационарым петырыме нерген лийын. Стационарым арален кодышаш верч кучедалмаш ынде икмыняр тылзе шуйна. Сутка мучко ыштыше стационарым петырыме дене 4 тӱжем утла еҥ медицинский обслуживаний деч посна кодын кертеш.

Здравоохранений министр Максим Васильевич погынышо-влаклан тиде жаплан ыштыме мера манын умылтараш тыршен. Эн тӱҥ амалже врач-влакын укелыкышт да тийышле оборудованийын ситыдымыже манын. Тиде йодышым республикысе здравоохранений министр пеҥгыде контрольышто куча манын.

- Тений 1 июль гыч здравоохраненийын первичный звеножым модернизироватлыме программа илышыш пура, - каласен тудо. -

Тендан район тиде программышке ик эн ончыч пурышаш. Тиде программа кышкарыште поликлиникым, больницым, вашке полыш

станцийым олмыктат да тийышле оборудований дене пойдарат.

Республикыште самырык специалист-влакым пашаш кондымо шотышто программа пашам ышта - илыме верым ойырат, оксам тўлат.

Ынде целевой направлений почеш тунемше самырык врач-влак кум ий тунемаш колтышо учрежденийыште отработкым ышташ тӱҥалыт. Тиде сай могырыш вашталтышым ышта манын ӱшанен кодына. Улшо положенийым умылтараш рӱдӧ районный больницын тӱҥ врачше Ильдар Жанович Абзалтдинов деч йодна.

- Кадр-влак ситыдымаш чыла вере шижылтеш. Районный больницыштат, Чорайыштат врач-влак огыт сите. Чорай участковый

больница гыч пытартыш жапыште кок терапевт каен - иктыже пенсийыш, весыже тийышле жапым - кум ийым ыштымеке, вес вере

каен. Сандене сутка мучко ыштыше стационарым кучаш йӧн уке.

Кокымшо, сутка мучко лийме стационарыште тийышле оборудований лийшаш (рентген аппарат, УЗИ, ФГС да молат). Чыла тиде

уке гын, страховой компаний-влак мемнам наказатлат. Теве тиде кок амал сутка мучко ыштыше стационарым Мишкан рӱдӧ районный больницыш кусараш ыштен. Сутка мучко врачын полышыжо кӱлдымӧ черле-влакым кечывалымсе стационарыште ончаш, эмлаш районный больница гыч арняште кум гана терапевт, ик гана дене педиатр, гинеколог, хирург толаш тӱҥалыт.

Кӱшнӧ каласышна, тений 1 июль гыч первичный звеном модернизоватлыме программа илышыш пура. Тиде программа

кышкарыште чыла ФАП, больница тийышле оборудований дене пойдаралтшаш. Целевой направлений дене врач-влак толаш да

у оборудований лиеш гын, ялысе здравоохранений йол ўмбак шогалеш манын ўшан шочеш. Чорай участковый больницат нунын коклашке логалеш манын шонена.

Венера АГЛЯМОВА.