Мондаш лийдыме вашлиймаш

Мондаш лийдыме вашлиймаш

Афганистан гыч Совет войскан ограниченный контингентшым лукмылан 31 ий темын.

Россий Федерацийыште тиде дата официально палемдалтеш. Тудо йот эллаште служебный долгыштым шуктышо воин-интернационалист-влакын подвигыштым шарнаш да жаплаш виктаралтын.

«Боевой действийын геройжо дене мутланымаш» республиканский патриотический акций кышкарыште Ирсай ялысе волонтер, РДШ-н да «Самырык Гвардийын» чолгаеҥже-влак боевой действийын ветеранже Эдуард Михайлов дене вашлийыныт. Воин-интернационалист самырык-влаклан шкенжын илышыже, службыжо да наградыже-влак нерген палдарен.

Эдуард Николаевич Кӱшыл Шогертен ялыште шочын-кушкын. Ирсай кыдалаш школышто тунемын. 1986 ий октябрьыште армийыш служитлаш каен. Дорожно-комендантский войскашке механик-водительлан логалын – бронетранспортерым виктарен. 1987 ий февральыште частьшым Афганистан Республикыш колтеныт. Э. Михайлов туштат бронетранспортерым виктарен – Пули-Хумри провинцийыште Келагай долиныште колонна-влакым душман-влак дечын арален. «Воину-интернационалисту», «Воину-интернационалисту от благодарного афганского народа», «Отличник Советской Армии», «Воину-спортсмену 1 степени», «70 лет Вооруженных Сил СССР», «60 лет Победы» медаль-влак дене палемдалтын.

Л. САЛЯЕВА.