Монар ялыште шашке да шахмат дене модыныт

Монар ялыште шашке да шахмат дене модыныт

Арам огыл ойлат: «Шахмат да шашке дене модмаш – тиде спорт, искусство, наука». Кӧ изинек нине модмаш-влак дене модеш, шоҥгеммекыжат нунын дене модаш тӱҥалеш.

Кугу Сеҥымашлан 75 ий темме вашеш ятыр мероприятий эртаралтеш. Меат Монар ялысе клубышто погынышна да клуб пашаеҥ-влак дене пырля ялысе илалше-влак коклаште шахмат да шашке дене турнирым эртарышна.

Модмашке еҥ шуко погынен огыл гынат, тудет оҥайын эртыш. Турнирым Кугу Сеҥымашлан 75 ий теммылан лӱмдымӧ. Модмашке самырык-влакат ушнышт.

Ончыч пӧръеҥ-влак уш-акылыштым тергышт – соперниклан матым шындаш тыршышт. Модмаште икымше верым П. Я. Яншаев нале, Э. И. Иманбаев кокымшо лие, В. Я. Султанбаев – кумшо.

Ӱдырымаш-влак коклаште Д. Б. Иманбаева сеҥышыш лекте. Кокымшо верым А. С. Сайфутдинова нале, кумшым – Н. П. Яваева.

Самырык-влак коклаште вер-влак тыге шелылтыч: 1 вер – Е. Васингина, 2 вер – И. Калитова, 3 вер – А. Султанбаева.

Тыгай модмаш-влак моткоч кӱлешан, оҥай да пайдале улыт. Пагалыме илалше да самырык-влак, тыгай турнирлашке ушнаш ида вожыл, ида лӱд, ида ӧркане. Ушныза, модса, уш-акылдалан жап деч ончыч шоҥгемаш эрыкым ида пу!

А. САЙСАНОВА, верысе ветеран-влак организацийын председательже.