«Ме омышто гына канена…»

«Ме омышто гына канена…»

Шукерте огыл ме «Старт» спортивно-тазартыме лагерьыш теле жапыште шуктымо пашаж дене палыме лияш мийышна.

Игече леве, кече онча. Лагерь деке лишемме годым тора гычак йоча-влакын юарлыме йӱкыштым колна, а лишкырак мийымеке, курык гыч тюбинг дене мунчалтыше ӱдыр ден эрге-влакым ужна.

Лагерьын директоржо Родион Шагиевич Шайбаков мемнам лагерь капка воктене вашлие. Порын саламлалтмеке, шокшо чайым подылаш ӱжӧ. Вет марий-влак кеч-кунамат суртыш толшо еҥлан чайым йўктат, вара веле молан толмыжым умылаш тыршат.

Чай йӱмӧ годым лагерьын теле жапысе пашаж нерген мутым лукна.

- Родион Шагиевич, - йодам начальник деч, - тыланда телыжге-кеҥежшыге йоча-влак дене пашам ышташ йӧсӧ огыл?

- Уке, йӧсӧ огыл. Тиде мыйын пашам. Шоналтыза шке, мыйын йырем илыш шолеш, йоча-влакын веселан юарлымышт, весела чурийышт. Тидын дечын нояш лиеш мо?

- Эре тыге лийын огыл дыр? Те мыняр ий лагерь вуйлатышылан ыштеда?

- 22 ий. Кунам мый дечем тидым йодыт, эре кодшо курымын 80-ше, 90-ше ийлажым шарналтем. Вот тунам мемнан илышна чынжымак «ӱй да мӱй» лийын. Сутка мучко дежуритленна - кочкаш шолташ вӱдым памаш гыч нумалынна, палаткыште иленна, пӱяште йӱштылынна. Тунам пӱя кугу лийын, Уфа гыч рвезе-влак байдарка дене кошташ толыныт. А кастене музикан сем почеш кандырам але вальсым куштенна.

Таче лагерь - мландыште изи узьмак.

- Кеҥеж кузе эртен? Йоча-влак могай кумыл дене лагерь гыч каеныт? Чыла шонымашдам шуктен кертында мо?

- Кеҥеж каныш эре ямдылалтме паша гыч тӱҥалеш. Тиде - планыште палемдыме заданий-влакым, Роспотребнадзорын, санэпидемстанцийын, МЧС-ын надзорный органже-влакын йодмашыштым шуктымаш. Лагерьыште пашам ыштыше-влакым - вожатый, повар, медшӱжар да молым - туныктымаш. Мемнан командына моткоч виян. Тыште кугу пашам йоча-влакын кеҥежымсе канышыштым организоватлыше координатор Алена Семеновна Килинбаева шукта. Лагерьым кеҥеж канышлан ямдылаш образований отделын, ДЮСШ-н пашаеҥже влак чот полшат. Сандене йоча-влакын канышышт комфортный манме условийыште эрта. Мемнан деке ик гана толшо йоча вес ийлан уэш толаш тырша.

- Пашада сайын организоватлалтын гынат, проблемыдат ситышын уло вет. Мутлан, лагерьыш толмо корно, кӱвар, йӱштылмӧ вер.

- Чын ойледа. Эн кугу проблемына - Кульчубай могырым толмаште кӱварым олмыктымаш лийын. Тиде кӱварым капитально олмыкташ пунчалым луктынна да тудым шуктенна. Тидлан кугу полышым Тымбай сельсовет ыштен. А теве Чорай могырым толмаште кўвар кызытат проблемныйлан шотлалтеш.

Кодший ме шуко пашам ыштенна: клубым, душевойым, мушкылтмо пєлемым олмыктенна. Вашке у мончам чоҥен пытарена. Лагерьыште оҥайрак лийже манын, велосипед-влакым налынна. Нуно тренировкылан, турпоходыш лекташ пеш кӱлыт.

- Кызыт лагерьыште кӧ кана?

- Шкеат ужында, яра жапым веселан эртараш шонышо-влак шукын улыт. Мемнан деке пошкудо район да олала гыч еш дене канаш толыт, пошкудо ялла, школла гыч йоча-влак коштыт. Игечын могай улмыж деч шукыжо шога. Иктышт ече дене коштыт, весышт тюбинг дене мунчалтат. Канаш чыла условий ышталтын - буфет пашам ышта, малаш пєлем-влак улыт, кумылан-влаклан мончаш олтена.

- Вес лагерь-влак дене кылым кучеда мо?

- Ме пошкудына-влак - Бирский, Бурай районласе лагерь-влак дене кылым кучена. Кодший Алена Семеновна дене Бирск оласе «Лесная сказка», «Чайка», Бурай районысо «Танып» лагерьлаште лийынна.

Шукерте огыл Бурай район гыч мемнан деке толын коштыныт. Нуно телым йоча-влаклан канаш могай условий улмым шке шинчашт дене ужыныт. Нунылан тыште пеш келшен.

Чеверласыме деч ончыч меат тюбинг дене мунчалтышна. Моткоч келшен.

Пытартышлан иктым гына каласыме шуэш, тыште мемнан икшывына-влак ӱшанле кидыште улыт.

Ешарена, лагерьлан негызым пыштыше, Мишкан районышто икымше спорт мастер Д. Тимиркаевым порын шарнат. Кажне ийын тудлан лӱмлалтше ече дене таҥасымашым организоватлат.

Венера АГЛЯМОВА.