Марий калык Погыныш делегат-влакым сайлыме

Марий калык Погыныш делегат-влакым сайлыме

Погынымашке чылаже 61 еҥ толын - ӱжмӧ 11 сельский поселений гыч 10 сельский поселенийын представительышт. Ӧрдыжеш

Новотроицкий сельсовет сельский поселений гына кодын.

Погынымашым «Эрвел марий» марий национально-культурный автономийын председательже В. Т. Байбулатов почын. Тудо

погынышо-влаклан сай кандидат-влакым сайлаш тыланен.

Мер Каҥашын уставше почеш, Марий калык Погыныш 1500 марий кокла гыч ик делегат сайлалтеш. 2010 ийысе калык перепись

почеш, районыштына 18 тӱжем наре марий ила. Тидлан кӧра Мишкан район гыч 12 делегат сайлалтеш.

Делегатым ойырымо да сайлыме паша, конешне, куштылго огыл. Районыштына пашаштышт, спортышто да мер илышыште ойыртемалтше марий шуко. Тидлан кєра посна комиссий делегатлан кандидат-влак спискым ончылгоч ямдылен да нуным илышын тӱрлӧ сферыж гыч ойыраш тыршен – туныктышо, директор, культура пашаеҥ, библиотекарь, мер пашаеҥ...

Погынышо-влакым тиде списке дене палдарыме. Каҥашымеке да изирак вашталтышым пуртымеке, тудым йӧплымӧ. Келшыдымашат, конешне, лектын. Мутлан, чыла сельский поселений гычат кандидат уке улмылан вуйым шийыныт. А икмыняр кандидат шке олмешыже вес еҥым темлен. Погынымаште делегатын пашажым йоҥылыш умылымаш шижылтын. Южо еҥ нунын радамыш логалмашым пашаште да мер илышыште чолга улмылан награда – Марий Элыш оҥай экскурсий семын ужеш. Но тиде тўрыснек тыге огыл. Делегат Марий калык Погыныш канаш огыл, а тушто шочмо калыкын интересшым аралаш кая.

Тачысе кечылан, мутлан, шочмо йылмым туныктымо шотышто методический пособий ден шочмо йылме дене туныктымо шотышто

методический программа-влак укелык шижылтеш. Тидым выступатлыше-влакат палемденыт. Сандене ончыкылык делегат-влак дечын тиде ситыдымашым кораҥдаш йодыныт. А пашаштышт да мер илышыште ойыртемалтше-влаклан, кеч идалыклан ик гана, Марий Элыш экскурсийым организоватлаш темлыме. Ме ўшанена – калыкын йодмашыже шукталтеш да Марий Элым пашаж дене сулен налше ятыр еҥ ужын кертеш. Каҥашымаш деч вара уэмдыме список почеш кандидат-влакым сайлыме – темлыме 12 делегат верч погынышо-влакын утларак ужашыже йўклен. Ме ўшанена: нуно Марий калык Погыныш арам огыт кай да тушто сайлыше-влакын йодмашыштым шукташак тыршат.

XI-ше Марий калык Погыныш Башкортостан Республик гыч чылаже 69 делегат кая. Делегацийышке Мер Каҥашын членже-влак

ешаралтыт: А. В. Ибулаев, Д. И. Ибашев, И. И. Тимиряева, А. Я. Гайсин, С. А. Александров, П. И. Бикмурзин да И. И. Губаев.

В. КАМИЛЯНОВ.