Эн шуко мӱйым Башкортостаныште кӱзат

Эн шуко мӱйым Башкортостаныште кӱзат

Росстатын «Российын регионжо-влак. 2018 ийлан социально-экономический показатель-влак» официальный сборникыштыже мҥй лектыш шотышто ойыртемалтше эн ончыл 20 регионым ончыктымо.

Тушто палемдыме почеш, 2017 ийыште эн шуко, 5390 тонн, мӱйым Башкортостан Республикыште кӱзымє. Кокымшо верым Приморский край айлен, тыште 5004 тонным туленыт, кумшо верыште – Алтай край. Умбакыже Татарстан Республик, Ростов область, Краснодарский край, Белгородский область каят. Колымшо верым Смоленский область айлен, тудо 954 тонным кӱзен.

Тыгай статистике тичмаш налмаште эн шуко мӱйым налше регион-влакым ончыкта. Посна регион кумдык шот дене мыняр кугурак, мӱйжымат тунарланак шукырак кӱза. А теве кажне квадратный километр кумдыклан шотлымаште мыняр мӱйым налме посна кундемыште мӱкш ончымо пашам кузе виктарен колтымым раш ончыкта. Тыштат коло эн ончыл регионым палемдыме.

2017 ийыште кажне квадратный километрлан шотлымаште эн шуко, 86,5 килограмм, мӱйым Белгородский областьыште кӱзымє. Кокымшо верым Татарстан Республик айлен, тыште 56,2 килограммым тулымо, кумшо верыште – Ингушетий, нылымшыште – Адыгей, визымшыште – Крым, кудымшышто – Башкортостан республик-влак. Тиде спискыште Марий Эл Республик латкокымшо верым айлен. Марий-влак кажне квадратный кило-метрлан шотлымаште 33,4 килограмм мӱйым кӱзат.

Тышечын коеш: эн шуко мӱйым кӱзышє Башкортостан Республик кокымшо рейтингыште кудымшо вер марте волен каен. А теве икымше лу регион-влак коклашке логалше Оренбург область кокымшо рейтинг радам гыч эсогыл лектын возын. Тыгодымак Ингушетий, Адыгей Республик, Липецкий ден Калининград область-влак коло эн сай регион-влак коклашке логалыныт.

Валерий Абукев.