Дистанционно тунемына

Дистанционно тунемына

6 апрельыште республикысе чыла школыштат дистанционный йӧн дене туныкташ ӱҥалыныт

Тидын нерген республикысе правительствын арня еда эртарыме оперативный совещанийыште БР-се образований да наука министр Айбулат Хажин ойлен. Тунемме кече виш урок дене тӱҥалын, тудым Башкортостан вуйлатыше Радий Хабиров эртарен.Тиде практикым ончыкыжымат шуяш палемдалтын, тушко лӱмлӧ политик, спортсмен, культура пашаеҥ-влакым ушаш темлдалтын. Тыгай урок-влакым БСТ, «Башкортостан 24», «Вся Уфа» да UTV телеканаллаште ончаш лиеш. Нине каналлаштак икымше класс-влаклан урок-влак эрташ тўҥалыт.

- Йоча-влак тунемшаш улыт. Сандене тыгай пунчалым луктынна. Общество тидын дене келшен, ача-ава-влакат, туныктышо-влакат тудым йӧпленыт. Коеш, йоча-влак тунемнешт. Ынде паша тендан ўмбаке да госуправленийым цифровой вияҥдыме министерство ӱмбаке возеш, - палемден Радий Хабиров. - Но иктым палыза, эше ик-кок кече тыге юватылаш тӱҥалыда гын, арня мучаште йоча-влакын тунемаш кумылышт йомеш. Нунылан нормальный системым ыштыза. Стандартный огыл йӧн-влакым кычалза. Тиде мемнан чумыр командылан пеш кугу текшырымаш.

Ты режим дене икымше кече туныктымаш пеш начар ямдылалтмым ончыктен. Кокымшо кечылан улшо ситыдымаш-влакым кораҥдаш тыршыме. 7 апрельыште тыгай сервис-влакым кучылтын 276 онлайн урокым эртарыме: Skupe, Soom, Jitsi, Youtube. Тиддеч посна Яндекс, Учебник, Якласс, инфоурок платформа-влакым кучылтмо. 50 йоча кагаз кейсым налын. Моло урок-влак электронный кейс полшымо дене эртаралтыныт, тидлан мессенджер ден социальный сеть-влакым кучылтмо. Ыштыме заданий-влак электронный кейсым колтымо йӧн денак налылтыт. Чыла занятий палемдыме расписаний почеш эртат. Тунемше ден туныктышо-влак кокласе кыл ышталтын.

В. Абукаев.