Чыла шӱкат ТКО огыл

Чыла шӱкат ТКО огыл

Закон дене келшышын, ТКО – граждан-влакын илыме верыштышт погынышо шӱк ден потребительский свойствыжым йомдарыше (просроченный) сату.

Теле толмо деч ончыч еҥ-влак сурт-оралтыштышт арулыкым пуртат, пӧртыштым телылан ямдылат, тидын годым ятыр шӱкым чумырат да контейнер площадкышке намиен ястарат. Тушто сўмырымӧ пушеҥгымат, воштыр-влакымат, шўкшудо орамат ужаш лиеш.

Тыгай шўкым контейнерыш опташ але контейнер воктене ястарен кодаш лиеш мо? РФ-се пўртўс ресурс да экологий министерство умылтара: «Тўрлӧ кушкылым куштымо годым погынышо шўк (воштыр, лышташ, моло пу шўк) 89-ФЗ №-ан закон почеш ТКО-лан ок шотлалт - тыгай шўк илыме верыште (пӧртыштӧ) ок погыно».

Тидлан кӧра воштыр-влакым, лышташым, тўрлӧ вондым, пўшеҥгын ужашыжым контейнер площадкылаште верланыше баклашке кышкыман огыл. Контейнерлашке кышкаш лийдыме шўк радамышке тыгак пудыргышо теплице, тошто пленка, тошто пече да моло пурат.

Тугеже, сурт озалан, тыгай шўк погынен гын, мом ыштыман? Вет озанлыкыште чыла тыгай шўкын кўлешлыкше уке. Воштыр ден лышташым пакчаште шалаташ лиеш гын, мутлан, тошто пленка але теплице дене мом ыштыман? РФ-се пўртўс ресурс да экологий министерство палдара – оралте ден пакчаште погынышо да озанлыкыште кўлдымаш шўкым свалкышке шке кўшеш намиен шолаш перна. Пошкудо-влакынат тыгай шўкышт погынен гын, машинам але тракторым пырля тарлаш лиеш. А молыжым – тўрлӧ вондым, шўкшудым, лышташым, воштыр-влакым – посна лакыш опташ да шўмыжым вучаш кодеш. Ик жап гыч тиде шўк мландылан сай ўяҥдышыш савырна.

Палдарена: контейнер площадкышке кугу шўкымат лукташ лиеш. Но тиде шўк ТКО-лан шотлалтшаш. Закон дене келшышын, ТКО-лан илыме верыште погынышо шўк шотлалтеш, тыгак шкенжын свойствыштым йомдарыше сату. Тиде радамышке пурат: мебель, бытовой техника, сантехника да моло. Тыгай шўкым контейнер площадке гыч наҥгайымаш – региональный операторын тўҥ пашаже.

Тўрлӧӧ кушкыл шўк-влакым утлизироватлыме пашам закон управляющий кампаний, ТСЖ, верысе самоуправлений орган да мланде оза-влакын ўмбакышт пыштен. Воштыр-влакым, лышташым, шўкшудым, писке шўкым шупшыктымышт годым верысе самоуправлений орган-влак шўкым шупшыкташ лицензийым налше организаций дене посна договорым ыштышаш улыт.

С. ТОЙМУРЗИНА.