Айста, йоча площадке-влакым аралена!

Айста, йоча площадке-влакым аралена!

Пытартыш жапыште верысе вандал-влак утыр чӱчкыдын йоча площадке-влакым локтылаш тӱҥалыныт. Тыгай еҥ-влаклан вандал (тек акрет жапыште илыше вандал калык вуеш ок нал, но кызытсе саманыште культура объект-влакым локтышо-влакым лач тыге маныт) деч посна моло мут келшен ок тол. Нуно йоча-влак модмо верлаште тӱрлӧ уда мут-влакым возат да сӱретлат, тӱрлӧ арверым локтылыт.

Мутлан, «Ава ден икшывыже» паркым налына. Тиде паркыште верланыше йоча площадкыште изирак йоча-влакат, кугурак ӱдыр-эрге-влакат модаш да канаш йӧратат. Самырык-влакат

ӧрдыжеш огыт код улмаш – нуно орадыла карусельыште пӧрдыт. А вет нине карусель-влак изи йоча-влаклан гына келыштаралтыныт. А ача-ава-влак тидын годым теҥгыллаште шинчат да изи карусель-влакым пудыртымым умша карен ончат.

Ача-ава-влак! Икшывыда-влак дене мутланыза! Общественный погым аралаш кӱлмым нунылан, те огыл гын, кӧ умылтара? Кугыеҥ-влак нерген, конешне, посна мутым каласаш кӱлеш. Йоча площадкыште канфет да киш фантик-влак огыл, а пиве банке, вино кленча, сигарет пачке, сигарет окурко-влак кият. Йоча площадкыште самырык-влак веле огыл йӱдым шӱклат, кугыеҥ-влакат кечывалым уда пашам ыштен кодат.

Икманаш, йодыш пеш пӱсӧ улеш. Чыланат огыт умыло: йоча-площадкым чоҥаш ятыр оксам пытарыме, ынде тудым олмыкташ шагал огыл оксам муман. Парк мучко видеонаблюдений

камер-влакым вераҥдаш лиеш ыле, но тидлан эше шукырак окса кӱлеш. Тыгак нуным эре эскерен шогыман. Муниципалитет тиде йодышым, конешне, кораҥдаш тырша. «Ава ден икшывыже» паркым оролаш полицийымат ӱжаш палемдыме. Но кызытеш тидым ыштен шуктымо огыл.

Ончыкыжым йоча площадкым арален кодымо верч пеҥгыде мера-влакым приниматлаш палемдыме. Тудым локтылшо, шӱклышӧ, паркыште да йоча площадкыште алкоголян йӱышым йӱшӧ, тамакам шупшшо-влак мутым пеҥгыдын кучаш тӱҥалыт – нунылан шагал огыл штраф пышталтеш да локтымо погын акшым тўлыкталтеш.

Самырык-влак, тендан шкендам кучен моштыдымыланда ачада ден авада мутым кучаш тӱҥалыт! Шӱкым ида кышке, йоча-влак модмо верым ида пудырто, ида локтыл! Площадке ок лий

гын, тендан шольыда да шӱжарда-влак кушто модаш, лӱҥгалташ да пӧрдаш тӱҥалыт? Мишкан селасе чыла оралтыштат йоча площадке уке.

Мишкан район МР администраций районышто илыше кажне еҥ дечын муниципальный погым перегаш, тудым пудыртышо-влакым ужыныт гын, юватылде полицийыш йыҥгырташ (мобильный телефон дене – 102 номер) йодеш.

Ме ӱшанена: самырык ден кугыеҥ-влак йоҥылыш пашаштым умылат да ончыкыжым чумыр погым аклаш да перегаш тӱҥалыт.