Келшымаш
+9 °С
Пылан
Все новости
Тӱрлӧ
11 теле 2020, 14:15

Мужество орден дене палемдалтын…

Мишкан ден Бурай районласе военный комиссариатыште колышо лейтенант А. Зайнитдиновын родо-шочшыж дене вашлиймаш эртен

Мужество орден дене палемдалтын…
Палыдыме салтакын кечыже - Россий историйыште тиде у шарнымаш кече. Тудо кажне ийын 3 декабрьыште, элыштына але вес кундемлаште эртыше боевой действийыште колышо салтак-влаклан лўмлалтын.
Тиде шарнымаш кечын Мишкан ден Бурай районласе военный комиссариатыште Россий Федерацийын государственный
наградыжым, мужество орденым колышо лейтенант Андрей Владимирович Зайнитдиновын ешыжлан кучыктымо.
Мужество орден дене общественный порядкым аралымаште лўддымылыкым да геройлыкым ончыктышо, стихийный бедствийыште, пожарыште, катастрофышто да моло чрезвычайный ситуацийыште еҥ-влакын илышыштым утарымаште, воинский, гражданский да служебный обязанностьым шуктымаште лўддымылыкым ончыктышо Россий Федераций гражданинлан пуалтеш.
Мемнан землякна, Пўрӧмучаш ялын эргыже Андрей Зайнитдинов воинский долгшым шуктымаште геройлыкым ончыктен.
Тудо 1995 ийыште 19 мартыште шочын. Латик классым тунем пытарымеке, армийыш каен. Срочный службым Балхаш олаште эртен. Пел ий служитлымеке, Пўрӧмучаш ял рвезе воинский образованийым налаш кумылаҥын. Озаҥ оласе
«Общевойсковая академия Вооруженных Сил Российской Федерации» сухопутный войскан военно-учебный рўдерын филиалышкыже тунемаш пурен.
2017 ий июньышто тиде филиал Озаҥысе высший танковый командный училищыш савырнен. 2018 ий декабрьыште Андрей «Специалист в области управления» специальность дене тунемме заведенийым пытарен. 2019 ий 19 январьыште А. Зайнитдинов Приморский крайыш эрвел военный округысо 5-ше армийын 127-ше мотострелковый дивизийын 84-ше посна танковый батальоныш танковый взводын командирже семын толын. 2020 ий 2 июльышто вўд чаракым эртыме плановый занятий годым внештатный ситуаций лийын: серыш лу метрым миен шушаш годым танкын двигательже
йӧрен да экипаж вўд йымак каяш тўҥалын. Лейтенант Андрей Зайнитдинов шке илышыжым чаманыде техникым да йолташыжым утараш тыршен.
Воинский долгым шуктымаште лўддымылыкым да геройлыкым ончыктымылан А. Зайнитдинов Россий Президентын 2020 ий 15 октябрьысе 628 №-ан Указше дене Мужество орден ден колымекше наградитлалтын. Тулык салтак вате Виктория
Зайнитдиновалан ты наградым БР военный комиссариатын мобилизационный отделын начальникше Р. Хайрутдинов кучыктен.
Колышо лейтенант А. Зайнитдиновын изи Ева ўдыржӧ кодын. Мишкан да Бурай районласе военный комиссар С. Васильев
Геройын ватыжлан, аваже Ираида Александровалан да ачаже Владимир Борисовичлан кеч-могай йодыш дене полышым йодын толаш темлен.
- Эн ончычак, тиде мыйын порысем да обязанностьем - тыланда кугу чаманымашым каласаш, - каласен Сергей Шуматович.
Эргым, изам, пелашым, ачам йомдараш эре неле. Зайнитдиновмыт тиде кечын шкеныштын эн лишыл еҥыштлан наградым гына огыл налыныт, а кугу чаманымашым колыныт. Ӱмыр лугыч лийше лишыл еҥлан тыгай кўкшӧ наградым налаш могайрак - тидым чыташ пеш неле. Тыште кугу йомдарымаш, ойго да тыгодымак шке долгшым ўшанлын шуктышо еҥ верч кугешнымаш шижылтеш. Чаманыме шомакым район администраций вуйлатышын кадр да социальный
йодыш-влак шотышто заместительже Л. Александрова ойлен. Тудо шке выступленийыштыже лейтенант Андрей Зайнитдинов землякше-влакын шўмыштышт эре илаш тўҥалеш манын.
Мероприятий Герой-влак аллейыште пеледышым пыштыме дене мучашлалтын.
Светлана ТОЙМУРЗИНА.