Келшымаш
-26 °С
Пылан
Все новости
Тӱрлӧ
30 Шыжа 2020, 16:39

«Кажне еҥын илышыште шке верже уло. Мый тудым муынам»

«Кажне еҥын илышыште шке верже уло. Мый тудым муынам» манеш Мишканыште корным олмыктымода чоҥымо управленийыште ыштыше катокын машинистше Ю. Валеев

«Кажне еҥын илышыште шке верже уло. Мый тудым муынам»
манеш Мишканыште корным олмыктымо да чоҥымо управленийыште ыштыше катокын машинистше Ю. Валеев
Юрий Анатольевич У Памаш ял гыч улеш. Тудо моктанаш ок йӧрате. Пашам йӧратыше марийлан газетеш возаш шонымына
нерген каласымеке, тудо ондак ӧрмалгыш, вара аптыранен колтыш.
Коллективыште чынжымак уста профессионал-влак мый дечем посна шукын улыт, нунын нерген возаш кӱлеш, а мыйын нерген возаш нимогай амал уке, манын умылтараш тыршыш. Амал уло.
Республикын кечыжым палемдыме годым Юрий Валеевлан Мишкан район МР администрацийын да Советын Чап кагазшым
кучыктымо.
Юрий 1979 ий 13 декабрьыште Алипа Шаяхметовна ден Анатолий Алексеевич Валеевмыт ешыште шочын. Кокымшо икшыве лийын. Аваже ӱмыржӧ мучко ушкал фермыште дояркылан ыштен, ачаже тракторист лийын, ДРСУ-што ыштен. Юрий ачаж корным ойырен налын. 2 №-ан Мишкан кыдалаш школышто 9 классым тунем пытарен, Мишканысе 150-ше ПУ-шко тунемаш пурен. Кум ий трактористлан тунемын. 1999 ийыште армийыш каен, Самара олаште мотострелковый войскаште служитлен. 2001 ийыште демобилизоватлалтын.
Армий деч вара коммунхозышто тракторист лийын, МПМК-ште да райпошто водительлан ыштен. Вахта йӧн дене Йӱдвел кундемыштат пашам ыштен шуктен. Варажым ачажын ыштыме организацийыш толын. Тыге Юрий Валеев уста специалист - катокын машинистше лийын. Тиде куштылго паша огыл. Юрий Анатольевичын вӱдымӧ грунтым пеҥгыдемдыше техника деч вара шыма да тєр корно кодеш. Шке должностной обязанностьшым шукташ Юрий Анатольевичын шинчымашыже сита, катокын устройствыжым, технический характеристикыжым, конструкцийжым, техникын пашам ыштыме принципшым, регулировка системым сайын пала.
Каток машинистшын мастарлыкшым аклаш кум квалифицированный разряд уло: нылымше, визымше да кудымшо. Ойыртемже техникын куатше деч шога. Юрий Валеевын визымше разряд. ДРСУ тений райцентрыште вич уремым тўзатен. Машинист Валеев Бирск - Тастуба - Сатка корным Козаш ял воктене олмыктымаште тыршен. Кызыт Юрий Валеев погрузчик дене ышта. Ме тудым асфальт заводышто учырышна. Тудо опытан пашаеҥ, коллективыште пагалымашым сулен. Катокын машинистше пашам чыла механизатор шуктен ок керт, тидлан поснак кугу ответственность, пеҥгыде
дисциплина да тӱткылык кӱлыт.
Юрий Валеев шке пашажым йӧрата да акла. «Молан ты пашам ойыренат?», - манмылан ондак ӧрмалгенрак вачыжым
туртыктыш, вара вашкыде пелештыш: «Ты илышыште кажне еҥын шке верже уло. Мый тудым муынам».
Светлана ТОЙМУРЗИНА.