Келшымаш
-30 °С
Пылан
Все новости
Тӱрлӧ
23 Шыжа 2020, 13:04

«ППМИ - мемнан ӱшанна»

Верысе инициативылан полшышо программа республикыште 2014 ий гыч пашам ышта. Тиде программылан кӧра шукоялыште йоча да спортивный площадке-влак ышталтыныт, корным олмыктымо.

«ППМИ - мемнан ӱшанна»
Программыште участвоватлыме тӱҥ условий - еҥ-влакын инициативышт. Лач еҥ-влак могай пашам ышташ кӱлмым палемдышаш улыт. Тидын дене келшышын окса ойыралтеш. Кугу полышым республиканский да верысе бюджет пуат, кодшо ужашыжым еҥ-влак шкешт погат да спонсор полышым налыт.
Мемнан район ППМИ-ште 2016 ий гыч участвоватлаш тӱҥалын. Тиддеч вара тушто 26 сельский поселений участвоватлен.
Тений 14 сельсовет йодмашым пуэн, но 7 сельсоветше гына тушко логал кертын. Нунын коклаште Кугу Шаде (2 №-ан Мишкан кыдалаш школын филиалже - Али Карнай лӱмеш кыдалаш школын столовыйжым олмыкташ), Ардаш (Тӧлдӧ ял уремыште корным олмыкташ), Кугу Соказа (Тӧргымдӱр ялыште паркым тӱзаташ да йолгорным ышташ конструкций ден материал-влакым налаш), Мавлют (Терекей уремысе корным олмыкташ), Мишкан (Уяллан МТЗ-82 тракторым налаш), Тымбай (Кульчубай яллан спортивно-модмо площадкылан установкым налаш да шындаш), Чорай (Раевка ял уремысе корным ышташ) сельсовет-влак лийыныт.
Кодшо арняште Раевка ден Тӧлдӧ ял уремласе корным калыклан сдатлыме. Раевкыште корнын кужытшо 1700 метр. Тудым чоҥаш республикын бюджетше гыч 1 миллион теҥгем ойырымо, верысе бюджет да еҥ-влакын, спонсор-влакын полышышт 100 тӱжем теҥге дене лийын. Электронный торгым «Гранстрой» ООО сеҥен налын (субподрядчик Ф. Фаршатов). Тӧлдӧ ялыште корным «СтройПроект» ООО (Р. Шамсутдинов) ыштен. Тыштат эн кугу суммым (1 миллион теҥге) республик ойырен, калык ден да спонсор-влак 100 тӱжем дене погеныт, район администраций 150 тӱжемым пуэн. Корнын кужытшо 1410 метр. Вара мемнан группа Ардаш сельсоветысе Эшым ялыш миен. Тыште верысе еҥ-влак ты программыш ушнаш кумылаҥыныт. Нуно ял кӧргысӧ корным тӧрлынешт.
2021 ийыште ППМИ программышке районысо чыла сельский поселений ушнаш шона.
Венера АГЛЯМОВА.