Келшымаш
-18 °С
Пылан
Все новости
Тӱрлӧ
16 Шыжа 2020, 15:38

Интернациональный сеҥымаш

Мишкан районын делегацийже регион-влак кокласе марафонышто вийжым терген

Интернациональный сеҥымаш
Шукерте огыл Республикысе Боевой Чап музейыште «Интернациональный сеҥымаш» регион-влак кокласе культура да историй марафонын VI этапше эртен.
Тушто шкеныштын презентацийыштым Башкортостан Республикысе финн-угор ассамблейыш пурышо калык-влак ончыктеныт. Икманаш марафонышко марий, эрзя, мокша, одо да кряшен-влак ушненыт. Марийын чапшым Мишкан район арален. Делегацийыш «Путник» йоча-юношеский рӱдерын методистше Ангелина Шамшитова, Янагуш ялысе Боевой да паша Чап музейын методистше Айрат Загитов, районысо Культура дворецын солистше-влак Станислав Салиев ден Олеся Мусалина пуреныт. Республикысе Чап музейыште мемнан делегацийна деке Уфа оласе «Эрвел марий» автономий вуйлатыше Галина Диндарьянова ушнен.
Мероприятий тӱҥалтыште фронтовик-влакын фотоштым нумалше «колыдымо полк» музей гыч Курымаш тул марте эртен. Марафон лач тушто - Сеҥымаш паркыште пеледыш аршашым пыштымаш гыч тӱҥалын.
Марафон кышкарыште марий, эрзя, мокша, одо да кряшен калык-влакын 1941-1945 ийласе Кугу Отечественный сарыште кредалмышт нерген тематический выставке, фото да видеоматериал-влак ончыкталтыныт. Музейын фойештыже Сеҥымаш верч кучедалме да тудым тылыште кузе таптыме нерген выставке-влак верланеныт. Мутлан, Айрат Загитов Мишкан район гыч улшо Совет Союзын Геройжо-влак нерген выставкым ямдылен да сар жапысе экспонат-влакым ончыктен.
Поро йўла почеш, мероприятий икмыняр блок гыч шоген: марий, одо, эрзя да мокша, кряшен. Кажне калык шкенжын геройжо-влак нерген ойлен, тидын годым художественный номер-влакым кучылтын. Ангелина Шамшитова Эшым ялын шочшыжо - Совет Союзын Геройжо Ишмай Иштубаевич Ишкининын илыш корныжо да подвигше дене палдарен. Олеся Мусалина «Йылдыр-йылдыр» мурым йоҥгалтарен, а Станислав Салиев «Офицеры» мурым мурен. Мероприятий сайын эртен, тудо ятыр еҥын кумылжым савырен.
Регион-влак кокласе марафонын VI этапше «День Победы» муро дене пытен. Тылеч вара эстафетым Кокла Азий калык-влаклан пуымо.
Фирдаус КАДИКОВА («Путник» рӱдерын материалже негызеш).