Йошкар-Олаш пӱтынь Россий гыч марий погынен

Йошкар-Олаш пӱтынь Россий гыч марий погынен

1 гыч 3 октябрь марте Йошкар-Олаште XI Марий калык погын эртен, тудын пашашкыже Российын 19 регионжо гыч, кушто марий-влак шукын илат, 400 наре делегат ушнен.

Мероприятий эше шошымак эртышаш ыле, но коронавирус шарлымылан кӧра тудым шыжышке кусарыме. Съездышке

ик эн кугу делегаций Пошкырт кундем гыч миен. Мишкан район гыч делегатлан 14 еҥ сайлалтын. Погын деч ончыч, 1 ок-

тябрьыште, Йошкар-Олаште Пеледыш пайрем эртен. Тудет икымше тыгай пайремым эртарымылан 100 ий теммылан лўмлалтын.

Пеледыш пайрем икымше гана 1920 ий 27 майыште Виче губернийысе Уржум уездысе Сернур селаште эртаралтын. Тунам Йошкар пеледыш пайрем манылтын. Пайрем идалык еда шошо ага пашам пытарымеке июнь тылзыште эртаралтеш. Но тений тудымат шыжышке – мланде пашам пытарыме жапыш кусарыме.

Коронавирус шарлыме лӱдыкшӧ пытыдымылан кӧра пайрем очный-заочный йӧн дене эртен. Дистанционно ныл площадке

пашам ыштен, тушто тӱрлӧ конкурс-влак эртаралтыныт. Офлайн йӧн дене пайремын торжественный ужашыже эртен. Мемнан район гыч Пеледыш пайремыште Ардаш ялысе Культура пӧрт пеленсе «Акарт» ансамбль выступатлен.

Йошкар-Олаш миен шумеке, мемнан делегацийнам Марий Эл газетын тӱҥ редакторжо А. Абдулов вашлийын. Унагудыш

пуртымеке, тудо делегацийнам Марий Элысе Республиканский изобразительный искусство музейышке И. М. Ямбердовын сўрет выставкыжым ончыкташ наҥгаен.

Каласен кодаш кӱлеш: кеч-кушко миенна гынат, А. Абдулов эре пеленна лийын да, иктаж экшык лектын гын, писын кораҥдаш полшен. Выставкым ончымеке, делегацийна Пеледыш пайремышке каен. Тушто мемнам ямле да оҥай концерт вучен.

2 октябрьыште делегацийна пӱтынь составше дене XI Марий калык погыным торжественно почмашке каен. Поро йӱла почеш, тудо М. Шкетан лӱмеш марий кугыжаныш театрыште эртен.

Делегат-влак залыште вераҥмеке, Россий Федерацийын да Марий Элын гимнышт йоҥгеныт, нунын почеш - марий калыкын «Марий сандалык» гимнже.

Тылеч вара пленарный заседаний тӱҥалын.

Кечывал деч вара делегат-влак тӱрлӧ секционный занятийлашке шаланеныт. Тений вич секций пашам ыштен: «Марий йӱла», «Калыкын ончыкылыкшо», «Мер паша», «Ял ден ола», «Еш, шинчымаш, шочмо йылме».

Секций-влакын пашашт марий йылме ден культурым аралаш да вияҥдаш виктаралтын. Мый ончылгоч «Марий йӱла» секцийышке возалтынам ыле. Вет кугезе йӱла деч посна калыкын ончыкылыкшо яндар огыл. Марий йӱлам мондышо писын

йылмыжым монда да рушыш савырна. Секцийыште марий онаеҥ, наука пашаеҥ-влак выступатленыт. Поснак Т. Евсеев лӱмеш музейын пашаеҥже-влакын выступленийышт оҥай лийын.

Кастене Марий кугыжаныш театрыште «Йыван Кырла. Путевка в жизнь» спектакльым ончыктеныт. Вес кечыжлан Оньыжам сайлыме. Оньыжалан кандидат-влак коклаште кызыт пашам ыштыше Эдуард Александров, Мер Каҥашын еҥже, Удмурт Республик гыч Анатолий Родыгин лийыныт.

Кандидат-влак шке программышт дене выступатленыт. Йӱклымаш деч вара Эдуард Александров 289 йӱк дене сеҥышыш

лектын. Палемден кодаш кӱлеш, Оньыжам сайлыме годым изи огыл ӱчашымаш лектын. Кызыт пашам ыштыше Оньыжам

шылтален ойлышо-влакат ятыр лийыныт, ситыдымаш-влакым палемденыт. Ончыкыжым чыла экшыкым шотыш налын, Эдуард Александров пашажым саемден колта манын ӱшанен кодына. Погын мучаште Э. Сапаев лӱмеш опера да балет театрыште «Поро кумылан марий калыкем» кугу концерт эртен.

Вячеслав КАМИЛЯНОВ.