Ужар урем ден ошкылам уэшын...

Ужар урем ден ошкылам мый эркын...

Кеч шыже тудым палын йошкартен,

Ужеш чонем пеледышан уремым,

Пеледше шошым сылне парк воктен.

Бульвар мотор, нӧлтеш эр кече модын,

Олам ӧндалын шокшын ӱжара...

Тышан шӱмем изиш каталтын кодын,

Чонемже тыште ожсыла ыра.

Изи Какшан коеш тугаяк поро,

Мушкеш чурийжым тыште шӧртньӧ эр

Да чеверта чияж ден кермыч орым,

Мутат уке, чыла йырваш чевер.

Но мый ужам эҥерым эрыканым,

А Марий парк пеледын рӱмбалга...

Йомартле марий семлан куаналын,

Воктене кӧ-дыр шыргыжын шога....

Ах, рвезе жап, кушан тый шылын кодыч?

Могай урем ден ошкылат вашкен?

Ала кандалге тӱтыраште йомыч

Мотор Изи Какшан эҥер воктен?

Налам Шкетан театр деке корным

Олан чурийжым мый уэш ужнем.

Да, шарналтен эрталше жапым порын,

Уэш марий подкогыльым тамлем.

Каяш жап шуо, шӱмым ит титакле...

Кума йошкар шинчажым светофор...

Уэш ужмеш, Йошкар-Ола тыматле...

Чеверын код, юалге кермыч ор.

Эсен Элай.