Келшымаш
-18 °С
Пылан
Все новости
Тӱрлӧ
30 Сентябрьыште 2020, 13:10

«Ужар Башкирийым» «Ужар Россий» деч ойыраш ок лий

Экологический акций кышкарыште Мишкан селаште «Герой-влак аллейыште» кож-влакым шындыме

«Ужар Башкирийым» «Ужар Россий» деч ойыраш ок лий
26 сентябрьыште Мишкан селаште «Ужар Россий» всероссийский экологический субботник кышкарыште «Ужар Башкирий» да «Сеҥымаш чодыра» акций-влак эртеныт.
Акцийлашке район администраций, образований, культура пашаеҥ-влак, муниципальный район Советын депутатше-влак, волонтер штаб, «Единый Российын» да «Самырык Гвардийын» членже-влак лектыныт. Кӱлеш инвентарьым, кольмым налмеке, экологический десант аллейым тӱзатымашке ушнен. Паша шолын. Чумыр вий дене 200 утла вондо омбовоштырым (пузыреплодник) шындыме. Ончыкыжым тиде вондер-влак калыкым мотор пеледышышт дене куандараш тӱҥалыт. Тиде кушкылым арам огыл ойырен налме. Тудо ӱмыл деч ок лӱд, уда игечым сайын чыта, писын шарла. Икманаш омбовоштыр аллейым палын тӱзатышаш. Тудо чонан четан семынат кучылталтеш, пӱчкедымеке, кушкыллан тӱрлӧ сыным пурташ лиеш. Омбовоштыр писын кушкеш – идалыклан 40 сантиметр марте. Икманаш, вашке «Герой-влак аллей» йӧршын вес сыным налеш.
Аллейыште тыгак вич канде кожым шындыме. Кажне кожшо районыштына шочын-кушшо але илыше вич геройлан лўмлалтын: Степан Казаковлан, Махмут Актугановлан, Ишмай Ишкининлан, Егор Орсаевлан да Гзи Загитовлан.
- Экологический субботник-влакым эртарымаш да ужар кушкыл-влакым шындымаш республикыштына поро йўлашке савырнен. «Ужар Башкирийым» «Ужар Россий» деч ойыраш ок лий, - каласен «Единый Россий» партийын верысе отделенийжын исполнительный секретарьже Н. Шамшиева.
Светлана ТОЙМУРЗИНА.