Шарнымаш ила

Шарнымаш ила

Мыйын кочам, Баяз Байметович Байметов - тылыште пашам ыштен. Шкеже Ӱлыл Шогертеныште шочын. Сар тӱҥалме годым тудлан 11 ий лийын. Сар тӱҥалме кечын, районысо шуко моло еҥ семын, кочана сабантуйышто лийын… Сар жапыште кеҥежым тудо имньым кўтылен.

Кочам аваж дене пырля колхоз правлений пӧртыштӧ илен, сандене кажне кечын «Сталинец» колхозын паша нерген сводкыжым Йылыш ялысе сельсоветыш кондыштарен. Тушечын почта гыч серыш-влакым конден, тыгак - похоронка-влакым.

Кочам сар, тудын участникше-влак, сар жапыште ялысе илыш нерген шуко ойлен. Тудын ойлымыжо почеш, 20 ий ончыч ялыште сарыште колышо-влаклан памятникым почаш ой лектын. Тунам пелашем, Эдуард Михайлович Килинбаев клуб вуйлатышылан ыштен. Ирсай сельсовет председатель Алевтина Ивановна Андриянова дене ты суапле пашам тӱҥалаш кутырен келшеныт да сарын участникше-влак спискым ышташ тӱҥалыныт. Но тунам ты пашалан оксам ойырен огытыл. Тиддеч вара обелискым чоҥымо шотышто йодыш кум гана ял калыкын погынымаштыже нӧлталтын.

2019 ийыште ты пашам уэш тӱҥалынна. «Они вернулись с Победой» шарнымаш книга гыч шкенан ялысе фронтовик-влакын лўмыштым возен луктынна. Кочам дене коктын тудын чын улмыжым текшырен лектынна, ситыдыме лўм-влакым районысо архивысе похозяйственный книга гыч налынна.

2020 ий апрель мучашыште VK Однокласники сайтыште шкенан ял гыч лекше-влак деке йодмаш дене лекна. Кугу Отечественный сарыште кредалше да ту жапыште тылыште пашам ыштыше-влакын родо-шочшышт, икшывышт да уныкашт, кугезе уныкашт-влак ышт вучыкто: кажныже кертмыж семын полыш кидшым шуялтен. Ик тылзе жапыште тиде памятникым чоҥаш ситыше оксам (90 тӱжем теҥгем) погымо да ик тылзат пелен жапыште тудым чоҥен шындыме. Тидлан кугу таум Эдуард Килинбаевлан, Игорь Килинбаевлан, Рудольф Салиевлан, Эдуард Байгазовлан ойлена. Ялысе шуко еҥ кертмыж семын ты поро пашам шукташ полшен. Чылаштлан кугу таум каласена.

А. КИЛИНБАЕВА.