«Мишкан - шочмо кундемем»

«Мишкан - шочмо кундемем»

Ӱшанле еш оза, примерный ача, йӧратыме коча, полшаш ямде улшо коллега, шке пашажын профессионалже - чыла тидым ик еҥ - Александр Геннадиевич нерген ойлаш лиеш.

Тудо 1960 ий 18 августышто Мишканыште шочын. Нина Ивановна ден Геннадий Васильевич Крутовмыт ешыште кокымшо икшыве, икымшыже Людмила.

1977 ийыште 1 №-ан Мишкан кыдалаш школышто 10 классым тунем пытарымеке, Марий политехнический институтыш тунемаш пурен. Марий Элыште вич ий тунемме жап мишкан эрге Саша Крутовлан кызыт ик кечыла эртен кайыме гай чучеш. 1982 ийыште чодыра озанлык инженерын дипломжо дене шочмо пошкырт кундемышкыже пӧртылын да Калининский лесничествыште ышташ тӱҥалын. Самырык специалистлан ты пашаште шуко ышташ логалын огыл: май гыч октябрь марте. Шыжым Александрым Совет Армий радамыш налыныт. Служитлаш Москва воктеке логалын, связь войскашке. 1984 ий шошым старший лейтенант демобилизоватлалтын да умбакыже шке специальностьшо дене пашам ыштен. Ик ий гыч шочмо Мишкан районышкыжо пӧртылын.

Самырык специалистлан пашаже келшен, но пӱрымаш шкем у пашаште терген ончаш темлен гын, молан рисковатлаш огыл. Тыге Александр Крутов 1986 ийыште шке илышыжым тура вашталтен: Мишкан киносетьын директоржылан ышташ тӱҥалын. Тудын годым у «Мир» кинотеатр почылтын.

27 ий кӱрылтде калыклан кином ончыктымо жапыште Александр Геннадьевич шуко грамотым, дипломым налын. Районныйжат, республиканскийжат ситышын улыт. 2013 ийыште киносетьым культура отдел дене ушеныт да Александр Геннадьевичым кино шотышто тӱҥ специалистлан шогалтеныт. Тиде должностьым таклан огыл пуртымо. 1996 ийыште тудо камерым налын да видеоматериал-влакым возгалаш тӱҥалын. Тиде жап гыч тудо уста профессионалыш савырнен. Оператор Александр Крутовын тӱҥ задачыже - эн оҥай сюжет-влакым учырен мошташ. Александр Геннадьевич репортаж-влакым войзымыж годым ончышо-влаклан оҥай лийже манын тырша. Видеооператор-влакым нуно шинчашт дене ужыт манын ойлат. Тиде тыгак. Мом ужмыштым нуно ик композицийыш чумыраш тыршат. Тидын годым чылажымат - объект-влакын верышт, волгыдо, еҥ-влакын чурийышт… Икманаш, кӧ тудын творчествыжым ок пале гын, интернетыш пурен ончыза.

Александр Геннадьевич творческий айдеме. Шке мастарлыкшым эре шуарен шога, квалификацийжым нӧлташ тырша,

Уфашке семинарлашке чӱчкыдын коштеш. Тудын творческий копилкыштыже «Менеджмент и маркетинг при Центре Би-Би-Си» шинчымашыже уло. Шуко ий тудо «Ватан» телевиденийын внештатный корреспондентше улеш. Кажне еҥлан шочмо-кушмо верже эн шерге улеш. Александр Крутов шочмо кундемжым пеш чот йӧрата. Сандене кажне пашаштыже тудын моторлыкшым моштен ончыкта.

Юбиляр нерген шуко поро мутым ойлаш лиеш. Тудо пиалан айдеме. Йєратыме пашаже уло. Илышыштыже шкалан келшыше пашам гына огыл, тыгак йӧратыме пелашыжым муын. Ватыже, Елена Викторовна, ынде 36 ий районысо образований системыште ышта да йоча садыш коштшо-влаклан музыкым туныкта.

Вашке Крутовмыт коралл сӱаным палемдат - 35 ий пырля илат. Кок эргышт кумда илыш корныш лектын, коктынат «Химий» специальность дене кўкшє образованийым налыныт. Кугурак Евгений эргышт ешыж дене Калуга олаште ила, шкеже фармацевтический заводышто пашам ышта. Изиракше, Кирилл, Новый Уренгой олаште пыжашым оптен, «Транснефтьыште» пашам ышта.

Крутовмытын ик йӧратыме занятийышт - пӱртӱс лоҥгашке канаш лекмаш. Вӱд воктеке, колым эҥыраш, колшӱрым шолташ. Тыгак поҥгым, снегым, мӧрым погаш йӧратат. Эм шудо-влакым погат.

Нуным уныкашт Леонид Евгеньевич куандара. Ныл ияш изи эрге кеҥежым коча-кувава дене уна лийын.

Светлана ТОЙМУРЗИНА.