Келшымаш
-20 °С
Пылан
Все новости
Тӱрлӧ
11 Сентябрьыште 2020, 13:06

Лепешкан мландыште

Тиде ялыште граждан сарын геройжо Чапаевын тезкыжо ила – тиде Василий Иванович Казимов

Лепешкан мландыште
Василий Иванович уже 25 ий ял староста улеш. Лач тынаре жап тудо шочмо ялжым тӱзатыме пашам виктара. Кӱлеш лиеш гын, Чапаев семын, чын верч кердым кучен шогаш ямде улеш. Икманаш, лӱм да ачалӱмжӧ денат, койышыж денат граждан сарын геройжылан лишыл. Арам огыл ялыште тудым Чапаев маныт. Но тиде мыскылтыш лӱм огыл, мӧҥгешла, чолга да ӧткыр улмыжым рашемда.
Мый Василий Ивановичым уже шукерте палем. Тудо калыкым ялым тӱзаташ, субботник-влакыш ушнаш, парк ден
сквер-влакым ышташ да моло пашалан моштен кумылаҥда. А паша лектын шога.
Мый паша дене Лепешкан ялышке ик гана огыл миенам. Кок ий ончыч ял калык ялышке корным олмыктен. Кажне сурт гыч 5 тӱжем теҥге дене погымо.
Чылаже 720 тӱжем теҥге погынен. Ик миллионым республикын бюджетше гыч ойырымо. Тыге корныш карьерный материалым вакшме да кок километрат пеле кужытым тӧрлымӧ. Ынде тиде корно дене кеч-могай игечыштат кошташ лиеш. Тылеч ончыч гын, шыжым да телым, танк дене гына пурен лекташ йӧн лийын.
Староста ден ял калык павильонымат ӧрдыжеш коден огытыл. Ынде тунемше ден моло корныеҥ-влак автобусым вучымышт годым йӱреш огыт нӧрӧ. Тиде суапле пашалан ял калык 500 теҥге дене поген.
Василий Ивановичын шке ешыже эше уке, но ялысе йоча-влак тудлан шке икшывыже гай улыт. Лепешкан Мишкан села да Пӱрӧ ола дечын тораште улеш гынат, ял кушкеш да тӱзлана. Лепешкан-влак шочмо кундемыштым уло кумылын йӧратат да тушечын нигушко каяш огыт вашке. Пашам тораште ыштат гынат, суртым шочмо ялыштыштак чоҥат, да сурт-оралтыштым гына огыл, пӱтынь ялым тӱзаташ да сылнештараш тыршат.
Ялыште йоча-влаклан модашышт чапле площадкым ыштеныт. Оксам поген, тӱрлӧ инвентарьым налме, чылажат лӱдыкшӧ
деч посна спорт дене кылым кучаш келшыше. А йоча площадкетыгак моторын койжо манын, тудым композитный материал дене печен налме.
Но Лепешкан ял калык поснак тӱҥалтыш школ да паркше дене кугешна. Парклан ойырымо участкыште лепешкан-влак 100 утла кожым шынденыт. Тиде цифрым арам огыл ойырен налме – ял гычын Кугу Отечественный сарышке кредалаш лач тынаре еҥ каен. Тылеч вара лепешкан-влак дечын моло ялыштат примерым налыныт. Шуко ялыште тыгай паркым шындыме.
Но лепешкан-влак садак ончылнырак улыт. Нуно парк деч тораште огыл изирак питомникым ыштеныт, тушто самырык пушеҥге-влак кушкыт. Жап шумеке, нине пушеҥге-влакым паркыште кусарен шындат. Чыла тиде пашам Василий Иванович эскера.
Школ шотышто. Тыштат йоча-влак ден тунемме заведений верч пӱтынь ял калыкын тыршымыже шижылтеш. Школым
Эльвира Байрамовна Алпаева вуйлата. Тушто 18 йоча тунемеш. Зданий у огыл, но пеш сай улеш. Кӧргыштыжӧ арулык озалана, чыла вереат ару, шукерте огыл чиялтыме.
- Ялыштына эн чот келшыше клуб укелык тургыжландара, - чон коржын ойла методист Виктория Эриковна Иванова. – Клуб
зданий тошто да утыр мландышке пура - вашке погынаш келшыдыме лиеш. Ме кушко гына возен огынал, но паша верже гыч тарванен огыл. Тудым чоҥаш, конешне, ятыр окса кўлеш. Но район материалым налаш полша гын, ме шкат чоҥена ыле, - ойла В. Иванова. - Ӱжына гын, калык погына. Специалист-влакат ситышын улыт.
Лепешканыште илыше-влак верчын веле огыл, кугезе-влак верч шарнымаш илыже манынат тыршат – шўгарлаштым тӱзатен да эрыктен шогат. Палемден кодыде ок лий, Лепешкан ял калык тӱзатыме пашашке кумылын ушна, субботниклашке изижат, кугужат, шоҥгыжат лектеш. Калык тыгак тӱзатыме паша дене кылдалтше тӱрлӧ конкурслаште участвоватла да эре призовой вер-влакым налеш. Чыла тиде Василий Иванович Казимовын 25 ий вуйлатыме пашажын лектышыже.
...Газетлан материалым погымо годым староста, тудын пашаже да койыш-шоктышыж нерген возымо шуын. Но староста
шомакшым эре вес корно дене виктарен – ял калык, тӱрлӧ паша нерген ойлаш тӱҥалын. Мый тудын ойлымыж гычын иктым рашемдышым: Василий Иванович ял калыклан кӧра сай староста лийын, вет тыште кажне еҥ шочмо-вер-шєржым йӧрата да тудым тӱзатыме верч тырша. Лепешкан ялын ик чолга шочшыжо Василий Иванович Казимов нерген возымемым лач тиде шомак дене кошартынем ыле, но тудет тидым шижшыла, шочмо вер-шӧрым тӱзатыме пашам тыршен да алал
кумылын шуктышо-влак нерген ойлаш тӱҥале. Теве нунын лўмышт: Лиана, Надежда да Рудик Апсалямовмыт, Владимир Яниев, Аркадий Николаев, Леонид Аптыкаев, Анатолий Ильтубаев, Вера Кутсамаева, Софья Шумаева, Антонида Яндуганова, Альбина Александрова, Лариса Ильтубаева, Таля Ильтубаева... Тиде спискым, конешне, эше шуяш лиеш.
Вет Лепешканыште кажне еҥ шке ялже ден кундемжым уло кумылын йӧрата.
Вениамин КОНДОГИН.