Кигазытамак мланде уна-влакым поген

Кигазытамак мланде уна-влакым поген

Тиде кечын тушто ял пашаеҥ-влаклан памятникым да Шайхзада Бабич лӱмеш музейым почмо.

Игече чевер шоген – канде каваште ош кече шыман шыргыжын, юалге мардеж пуэн. Пайремышке Кигазытамакыште илыше-влак веле огыл, моло ял ден кумдемлаште илыше-влакат толыныт.

Мероприятий памятникым почмаш гыч тӱҥалын. Ял пашаеҥ-влаклан памятник оҥай. Постаментыш Т-40 тракторым шогалтыме. Тушто возымо: «Труженникам деревни Кигазытамаково от благодарных детей и внуков». Памятникым ышташ калыкым Халили Фарваев кумылаҥден. Тудын дене ял калыкат, Мишкан район МР администрацият, СП сельсоветат келшеныт.

Ынде йоча ден самырык-влакат 50-ше ийлаште колхоз пасушто пашам ыштыше тракторым ужын кертыт. Памятникым почмаште ял калыклан тау мутым Мишкан сельсовет СП администраций вуйлатыше Р. Ишмакаев, Ял озанлык пашан

сулло пашаеҥже, пашан ветеранже, К. Шайхутдинов, ялын шочшыжо Х. Фарваев ойленыт. Ик жап гыч йошкар тасмам пӱчмӧ. Тидым ышташ чапым БР-се Государственный Погын – Курултайын председательже, «Тӱнямбалсе пошкырт курултай» мер ушем-влак тӱнямбал ушем» президиумын председательже Э. Аиткуловалан, Мишкан сельсовет СП администраций вуйлатыше Р. Ишмакаевлан, пашан ветеранже, производствын ончылеҥже, кужу жап водитель лийын ыштыше Ф. Аслямовлан пуымо.

Тылеч вара чыланат школ зданий деке каеныт. Лач тушто лӱмлӧ землякна, поэт да просветитель Ш. Бабич лӱмеш музейым

почаш лийме. Тылеч ончыч тушто Шайхзада Бабич лӱмеш посна лук гына лийын. Ынде чын музейым почмо. Посна пєлма-влак улыт, тушто тӱрлӧ экспонат-влак верланеныт. Пырдыжлаште тукымвож-влак кечат. Ялыште пел калыкше Ш. Бабичын родо-шочшыжо улеш. Поэт шкеже тиде ялыште шочын огыл гынат, йоча жапше Кигазытамакыште эртен.

Музейым почмо лӱмеш торжественный мероприятийышке Уфа ола гыч лӱмлӧ уна-влак толыныт: «Тунямбалсе пошкырт курултай» мер ушем-влак тӱнямбал ушем» президиумын председательже Э. Аиткулова, БР культурын сулло пашаеҥже Р. Алтынбаев, БР-се Государтсвенный Погын – Курултайын депутатше, БР-се писатель ушемын председательже З. Алибаев да моло. Уна-влак коклаште Мишкан район МР администраций вуйлатыше П. Трапезниковат лийын.

Теве торжественный татат толын шуын. Мардежыште ловыкталтше йошкар лента пӱчкылтын да уна-влак зданий кӧргышкӧ пуреныт.

Музей дене палыме лиймеке, мер илышыште да пашаште ойыртемалтше-влакым палемдыме. «Мишкан районын почетан

гражданинже» лӱмым Шайхзада Бабич тукым гыч улшо, БР искусствын сулло пашаеҥже, «Мирас» фольклор ансамбльым вуйлатыше Нафира Бабичева-Иксановалан пуымо.

Памятник ден музейым ыштымаште да почмаште ойыртемалтше-влакым Мишкан район МР администрацийын да советын,

Тўнямбал курултайын БР-се исполкомжын, БР правительствынтауштыме серышышт дене палемдыме.

Пайрем Шайхзада Бабичын памятникше воктеке пеледыш аршашым пыштыме дене мучашлалтын.

Венера АГЛЯМОВА.