Пашажым ӱшанлын шукта

Пашажым ӱшанлын шукта

Дина Сергеевна туныктышо лияш изинек кумылаҥын. Школышто тудлан Надежда Яркиевна Александрован урокшо-влак моткоч келшеныт, ончыкылык пашам лач тудым ончен ойырен налын.

«Мый пӱрымашемым школышто тунеммем годым Надежда Яркиевнам вашлиймылан тауштен илем, - ойла туныктышо. – Тудо мемнам пеш сайын туныктен, жапшым чаманыде, келге шинчымашым пуаш тыршен да йоча-влакым йӧраташ, нунын дене пашам ышташ кумылаҥден».

Тыге ӱдыр школышто тунеммыж годымак тӱҥалтыш класслаште туныктышо лияш шонен пыштен. Шонымашыже шукталтын. Диана Сергеевна ондак Благовещенск оласе педагогический училищыште тунемын, варажым заочно Пӱрӧ оласе пединститутын педагогика да йоча жап факультетшым пытарен. Педучилищым тунем пытарымеке, Ӱлыл Шогертен ялысе тӱҥалтыш школышто пашам ышташ тӱҥалын, варажым Ирсай кыдалаш школышко куснен. Пашам Ӱлыл Шогертеныштат, Ирсайыштат тыршен ыштен да тунемшыже-влакым сайын туныктен да туныкта.

«Сай туныктышо лияш ондак шке пашам йӧратыман да тудым уло кумылын ыштыман. Тыгак тунемше-влакым йӧратыман», - возен О. Ключевский. Дина Сергеевна шкенжын пашажымат, тунемшыже-влакымат йӧрата, йоча-влакым чыным, пашам йєраташ, еҥым пагалаш туныкта. Пашаштыже тунемшыже-влакым личность семын пагала, усталыкыштым почаш, тунемаш кумылаҥдаш тырша.

Дина Сергеевна тӱҥалтыш класслаште 1989 ий гыч туныкта. Пашаштыже передовой опытлан эҥерташ тыр- ша. Тудын деке урокышкыжо чӱчкыдын кугу опытан туныктышо-влакат, педагогический практикым эртыше студент-влакат пурат. Урокышкыжо пурышо-влак чыланат усталыкшым да пашам сайын ыштымыжым палемдат. Дина Сергеевнан тунемшыже-влак коклаште школым ший да шӧртньӧ медаль дене пытарыше-влакат улыт, ятырын тӱрлӧ вузышто тунемыт. Шагал огыл тунемшыже туныктышо пашам ойырен налын, кызыт нуно але тӱҥалтыш класслаште тунык- тат, але воспитатель, методист улыт.

Дина Сергеевна урок-влакым веле огыл сайын эртара. Тудо тыгак сай класс вуйлатыше улеш, кустовой методический ушемым вуйлата. Тунемшыже-влак дене оҥай погынымаш, пайрем, экскурсий, поход, тематический кас-влакым эртара. Эртарыме мероприятийже-влак тунемше-влакланат, ача-ава-влакланат келшат да кужу жаплан шарнымашеш кодыт.

Дина Сергеевна пиалан ава улеш. Пелашыж дене коктын ныл эргым ончен куштеныт. Эрге-влак ынде чыланат кугу улыт, но садак аваж деке тӱрлӧ каҥашым йодын толыт, икманаш, йӧратат да пагалат.

Пашам кужу жап тыршен ыштымыжлан туныктышо ик гана огыл Чап грамот да тӱрлӧ кӱкшытан диплом дене палемдалтын. Но тудлан эн кугу награда – тунемшыже да ача-ава-влакын йєратымашышт да пагалымашышт.

С. АЛИЕВА.