Пӧкленде школ

Пӧкленде школ

Пагалыме газет редакций пашаеҥ-влак да лудшо йолташ-шамычем, икымше гана туныктышо лийын школыш пашаш тӱҥалме нерген серынем.

Тыге 1963 ий август тылзыште РОНО вуйлатыше (тунам Бирск район ыле) Пӧкленде тӱҥалтыш школыш туныктышылан направленийым кучык- тыш. 14 август эрдене тиде ялыш ошкыльым. Кече пеш мотор, йырысе пӱртӱсым куанен ончышыла шижынат шым шукто, миен шуым. Уремыште вашлийме икымше еҥ деч «Кушто школ верланен?» - манын йодым. Тудын умылтарен колтымыж почеш, школ деке миен шуым. Ончем: йыр- ваш пеш мотор, школ пеш ямле верыште верланен, воктене вӱд йога, пу зданий, кудывече кумда верым айлен, турник. «Ну, - шонем, - физкультур эртараш тыште чыла условий уло».

Школ пӧртончылно чаткан чийыше пӧръеҥ шога. Саламлалтна. Направленийым ончыктышым. Тудо молан толмем умылыш, куанен пелештыш: «О, пеш сай, мемнан деке шукертсек самырык, дипломан туныктышым колтен огытыл ыле, ӱмырешлан тышакынак вераҥыда гын, эшеат сай лиеш ыле». Вара классыш пурышна. Пеш ару пӧлем: тӧрза ончылно ик пурак уке, вурня ош пор дене пеш чаткан ошемдалтын, парт-влак радам дене шындалтыныт, кӱвароҥа, потолок пеш ару (чиян огыл).

Мый эрлашыжлан 1 классыш толшаш йоча-влакын ача-авашт деке коштым. Нуно йочаштым школлан чыла ямдыленыт: школ формо, портфель, ручка, линейке, простой да чиян карандаш - чыла уло.

Вучымо 1 сентябрь толын шуо. Ме, туныктышо-влак, омса ончылно вучен шогена. Чылан жапыште тольыч, шукыжын ача-авашт ӧрдыжеш кодын огытыл. Кудывечеш рат дене шогалтышна: 2, 3, 4 класс, а ончылно 1 класс йоча-влак. Директор Н. В. Валитов чыла толшо-влакым саламлыш, мыйымат икымше гана туныкташ тӱҥалме кече дене саламлыш. Вара строй дене 1 классыш толшо-влак классыш пурышт, парт коклаш шинчыч. Угыч саламлалтна, чылашт дене палыме лийна. «Мый тендан туныктышыда лиям, йодышда лиеш гын, йодса, ида вожыл. Мыйым Антонида Петровна маныт»,- каласышым. Школышто шкем кузе кучаш кӱлмӧ нерген ойлышна. «Ме ик еш гай улына, сандене вожылман огыл. Тӱгӧ лекмыда шуэш гын, йодса», - ешарышым. Классыште шкем кузе кучымо нергенат шарналтышна. Парт коклаш шинчын ончышым, йоча-влакат шинчыч, нуно пеш мотор койыт, чыланат шып шинчат, шинчашкем ўшан дене ончат.

Тидлан ятыр ий эртен, туге гынат тачысе кече гай шарнем, кузе икымше гана туныктышо лийын, 1 классыш толшо йоча-влакым вашлийынам. У Эшым ял гыч кажне кечын Пӧкленде школыш туныкташ куанен коштым.

Тиде серен колтымем 1 классыш 1963 ийыште толшо рвезе-ӱдыр-влак лудытат, ик жаплан изи йоча жапым шарналтат, шонем. Тидлан вет 57 ий эртен.

Пеш кугу тау Пӧкленде калыклан. Шокшо, поро мутланда, умылышан ача-аваланда, мутым колыштшо йоча-влаклан. Тендам ом мондо, икымше гана Пӧкленде школыш туныкташ тӱҥалмемлан куанен илем. Поро чонан улыда, таза, кужу ӱмыран лийза.

Антонида Игнаева (Петкина), Ардаш ял.