Келшымаш
-17 °С
Пылан
Все новости
Тӱрлӧ
28 Сорла 2020, 14:12

Кажне тунемше дене кылым муын мошта

Элла Янгубаева Чорай ялысе Я. Ялкайн лӱмеш марий гимназийыште руш йылмым да литературым 20 ий утла туныкта

Кажне тунемше дене кылым муын мошта
Чорай школышко Элла Олеговна 1999 ийыште БирГПИ-н филологический факультетшым тунем пытарымеке толын. Самырык туныктышо писын сай кӱкшытыш шуын да йоча-влаклан келге шинчымашым пуаш тӱҥалын.
Кажне уроклан тудо жапшым чаманыде, чонжым пыштен ямдылалтеш. Туныктымаште тӱрлӧ йӧным кучылтеш, урок-семинар, урок-зачёт, урок-шымлымаш, урок-мутланымаш, урок-шонымаш, урок-конференций, урок-вашлиймаш, урок-практикум, урок-экскурсий-влакым эртара.
Тыгак руш йылме да руш литератур, руш йылме да метематика интегрированный урок-влакым моштен кучылтеш.
Туныктышо урок-влакым кызытсе жаплан келыштараш тырша. Тидым ышташ кызытсе техника полша. Туныктышын кабинетыштыже компьютер, проектор, магнитофон, проигрыватель, аудиокассета-влак, фонохрестоматий, диск-влак улыт.
Но сай лектышым, конешне, жаплан келшен толшо техника огыл, а туныктышын усталыкше да тыршымыже, шке пашажым уло кумылын ыштымыже пуат. Элла Олеговна шкенжын тунемшыже-влакым чылаштымат пагала, ваш кылым муын мошта, усталыкыштлан ӱшана. Икманаш, Элла Олеговна Янгубаева йоча-влак дене пашалан уло шӱм-чонжым пуа. Вет йоча-влак мемнан ончыкылыкна улыт.
Б. РЫБАКОВА, Чорай ялысе Я. Ялкайн лӱмеш марий гимназий.