Школ ден йоча сад-влак у тунемме ийлан ямде улыт

Школ ден йоча сад-влак у тунемме ийлан ямде улыт

Межведомственный комиссийын пашажым район администраций вуйлатышын кадр да социальный йодыш-влак шотышто заместительже Л. Александрова вуйлатен.

Тудын пурла кидшылан комиссиийын секретарьже Г. Яниевым шогалтыме. Комиссий составыш образований отделын начальникше С. Александров, пожарный надзор шотышто Караидель межрайонный инспекцийын государственный инспекторжо С. Биктубаев, Россий МВД-н Мишкан районысо отделын ГИБДД отделенийжын БДД пропагандын государственный инспекторжо Б. Бакрадзе, район администрацийын ГО да ЧС специалистше Д. Латыпов, район администрацийын чоҥымо паша да жизнеобеспечений шотышто тӱҥ специалистше В. Шахмадеев, администрацийын пашам аралыме шотышто тӱҥ специалистше Ф. Фаттахов да образований отделын методистше ден специалистше-влак пуреныт.

Комиссийлан 42 образовательный учрежденийым тергаш да лу позиций дене ямдылыкыштым текшыраш кўлын. Образовательный учреждений-влакын материально-технический базышт, школ оралте, спортзал да мастерской, олмыктымо паша да молат ончалтыныт. Поснак кугу верым пожарный безопасностьлан, технический состоянийлан, тыгак йоча-влакын школышто лийме безопасностьыштлан ойыралтын.

Тўрыс ончалмаште, чыла школ ден йоча сад у тунемме ийлан сайын ямдылалтын. Кажне школышто корнышто лўдыкшє деч

посна коштмо, пожарный безопасность шотышто пусак-влак улыт, школ, йоча сад оралте-влак куандарат. Тўрлє программылан кєра 12 школышто модульный туалет, 15 школышто шокшо туалет ышталтыныт. Тиддеч посна Токтар, Кульчубай, Раевка, Пєкленде школлаште кызытсе жаплан келшыше столовый, а Памаш (Яндыган), Арзамат, Ваксола, Лепешкан, Озерка яллаште у столовый деч посна эше котельный-влакым уэмдыме. Мутат уке, южо учрежденийыште изи экшык-влак лийыныт, но нуно лишыл жапыште кораҥдалтыт.

Чумыр текшырымаш да погымо балл-влак почеш кыдалаш школ-влак коклаште вер-влак тыге палемдалтыныт: икымше верым Мишкан селасе 1 №-ан лицейлан пуымо, кокымшо да кумшо верлам Тымбай ден Кемий школвлак налыныт. Нунын баллышт икгай лийын.

Тӱп общеобразовательный школ-влак коклаште икымше верым Пӱнчер школлан, кокымшым Кугу Шаде школлан, кумшым Новотроицкий школлан пуымо.

Тӱҥалтыш школ-влак коклаште икымшым Корак школ, кокымшым Лепешкан, кумшым Ваксола школ налыныт. Йоча сад шотышто иктым ойлаш лиеш. Улшо ныл йоча сад да нунын филиалышт сайын ямдылалтыныт. Чыланат икгай баллым погеныт, сандене икымше да моло верлам иктыланат пуымо огыл.

Школ да йоча сад коллектив-влак ончылно выступатлышыла Лариса Геннадиевна, Сергей Андреевич да Григорий Николаевич шуктымо пашаштлан тауштеныт да у тунемме ий тӱҥалтыш дене саламленыт.

Лариса Геннадиевна ден Сергей Андреевич августысо совещаний могай формат дене эртыме нерген ойленыт. Коронавируслан кӧра 2020 ий неле лийын. Башкирийыште тений икымше гана августысо совещаний онлайн йӧн дене эрта. 19 августышто - дискуссионный площадке, 20 августышто - пленарный ужаш. Районный совещаний республикысе аналог дене 21 августышто эрта. Тыгак 1 сентябрьым кузе эртарыме, йоча-влакым пукшымо да шуко моло йодышымат каҥашыме.

Кугу верым чыла предписанийым, Роспотребнадзорын темлымашыже-влакым шуктымылан да Covid-19 черым тунемме заведенийлашке шараш эрыкым пуыдымылан ойыралтын. Школыш кажне йочам текшырен пуртыман, а тидлан кугу черет лийын кертеш. А ончылно, шыже, теле…

Вашке 1-ше сентябрь. Туныктышо-влакын тыршымыштлан кӧра школ-влак шке омсаштым почаш ямде улыт…

Татьяна ГОРДЕЕВА.