«Почтальон чыла пала…»

«Почтальон чыла пала…»

Нине шомак-влакым кодшо курымын 90-ше ийлаштыже кумдан палыме муро гыч налме. Арамлан огыл тыге маныныт, вет почта пашаеҥ-влак чыла уверым эн ончыч пален налыт.

Тидыже поснак яллаште шижылтеш. Вет ялыш уверым кондышыжо кызытат лач почтальон гына улеш. Теве тений коронавирус озаланыме пагытыште почтальон-влак яллаште эн чот вучымо еҥ лийыныт. Поснак 65 ияш деч кугурак-влаклан.

А теве Ленинский ялыште илыше-влак изиш гына почта отделений деч посна кодын огытыл. Ялыште тидлан келшыше зданий укелан кєра почта отделенийым петыраш пунчалым луктыныт.

Но тунам ялын активистше-влак да энтузиаст-влак ял староста В. Егоровын вуйлатымыж почеш ты йодышым шке решатлаш тарваненыт.

Почтылан келшыше зданийымат верештыныт. Школын ончычсо общежитийыштыже. Паша верже гыч тарванен. Кӱчык жапыште верандым рончымо, кӱвароҥам вашталтыме, тошто пу раман тӧрза-влак олмеш жаплан келшыше пластик тӧрза-влакым шындыме.

Тошто зданий у вургемым чиен шогалын. Тудым олмыкташ кӱлшӧ оксам ял калык деч погымо. Тыгак Мишкан сельсовет СП администраций полшен.

Почта отделенийым почмо мероприятийыште Бирский почтамтын начальникше Данис Гильфанов, Мишкан сельсовет

СП администраций вуйлатыше Рустам Ишмакаев лийыныт. Нуно Ленинский ял калыкым ты пайрем кече дене шокшын саламленыт. А почта отделенийым почмаш ял калыклан чынжымак кугу пайремыш савырнен.

- Ме палена, ялыште почта - эн кӱлешан вер, - каласен шке выступленийыштыже Данис Рашитович. - Пытартыш ийлаште

мемнан пашана кумдаҥын. Пашаеҥна-влак ынде почтальон гына огытыл, сатучышкат савырненыт (тыште калык йодмо сатум ужалат), банк пашаеҥат улыт (кредитым оформитлат, тӱрлӧ тӱлам налыт). Почтальон-влак - отделений вуйлатыше Г. Бикмухаметова, Н. Янышева, Н. Алкечева шке пашаштым сайын шуктат. Еҥ-влак нунылан эре тау мутым гына ойлат.

Могай пайрем награждений деч посна? Тыштат олмыктымо пашаште тыршыше-влак С. Яшпаев, А. Яшкузин, Г. Байгузин, В. Петухов, С. Иванов, И. Михайлов, Г. Тойгузин, В. Алкечев, В. Апсатаров, В. Егоров шке пєлекыштым налыныт.

Пӧлекшат ойыртемалтше лийын - ик мешак ложаш. Почта отделенийым почмо дене Ленинский ял калыкым районысо Культура дворецын пашаеҥже-влак И. Аликаева ден О. Мусалина сылне мурышт дене саламленыт.

Венера АГЛЯМОВА.