Моряк-влаклан лўмлалтын

Июльын пытартыш каныш кечыштыже теныз флотышто служитлыше-влак чумыргеныт. Вашлиймаш куаным моряк-влакын ватышт, икшывышт да родо-шочшышт пайленыт. Торжественный погынымашке пагалыме уна-влак ўжылтыныт.

Эн ончыч Мишкан селасе уремлаште автопробег эртен. Тушто 40 машина участвоватлен. Варажым моряк-влак РДК деч каныме да культура паркыш строй дене каеныт. Тушто торжественный погынымашлан чыла ямде лийын. Мероприятийым Россий Федерацийын да Башкортостан Республикын гимнышт дене почмо. Йошгкар лентым пўчкаш Мишкан район МР администраций вуйлатыше Павел Трапезниквлан, мемориальный комплексым ыштымылан вуйын шогышо инициативный группын вуйлатышыже Ралиф Мукимовлан, проектын авторжо Вячеслав Сабировлан да дизайнер-проектировщик Вилюр Шакировлан правам пуымо. Теве рында йўк йонгалтын, флаг-влак нёлталалтыныт. Тўрлё конфессийын представительже-влак мемориальный комплесым освятитленыт.

Погынышо-влак ончылно МР администраций вуйлатыше выступатлен.

- Тиде кече кум пайремым иктыш ушен - Кугу Сенымашлан 75 ий, Военно-Морской флот кече да мемориальный комплексым почмо. Таче игечыжат пеш мотор, каваште, очыни, кё-гынат моряк-влакым арала.

Военно-Морской флот - шочмо элым аралыше куатле вий. Ик ий ончыч ты комплекслан икымше кўм пыштыме, тиддеч вара пеш кугу паша шукталтын, - манын Павед Владимирович.

Инициативный группын членже-влаклан, проектым илышыш пуртышо да эн чолга моряк-влаклан тауштыме серышым, чап кагазым да шарнымаш медаль-влакым кучыктымо.

Погынышо-влак ончылно уна-влак, воинский порысым шуктымаште колышо-влакын шочшышт, теныз братствын представительже-влак выступатленыт. Шуко шокшо мут ойлалтын. Тиде патриотический проект кушкын толшо тукымым воспитатлымаште кугу рольым шукташ тўналеш.

Пайрем пеш сайын эртен да кужу жаплан шарнымашеш кодеш. РДК пашаен-влак погынымшо-влаклан пайрем концертым ончыктеныт.

Татьяна ГОРДЕЕВА.