Эн кугу спорт рўдер

Российыште ик эн кугу спорт рўдерым Уфаште ыштыме. Тудлан тўнямбал кўкшытан паралимпийский спортын легендыже куштылго атлет Рима Баталован лўмжым пуымо. Тиде чолга марий ўдырамашын эн шуко наградыже.

Башкортостан гыч кенеж паралимпийский модмашын чемпионжо Рима Акбердиновна Баталова Сеулышто (1988), Барселонышто (1992), Атлантыште (1996), Сиднейыште (2000), Афишыште (2004), Пекиныште (2008) эртыше паралимпиадылаште вийжым терген да 100, 200, 400, 800, 1500, 3000, 5000 метрыш куржталмаште 13 гана чемпионко лийын. Начарын ужшо инвалид-влак коклаште 18 гана тўнямбал, 43 гана Европын, шуко гана СССР-ын, Российын, Башкортостанын чемпионкыж семын палыме. Тўнямбалне 36 гана рекордсменкыже 6 гана почела паралимпийский модмаште вийжым терген. Тудо 20 гана тўнямбал рекордым шынден, Гиннессын рекорд книгашкыже логалын.

Рима Баталова – РФ Кугыжаныш Думым депутатше, Россий Паралимпийский комитетын вице-президентше, Сочисе Паралимпийский теле модмаште организационный комитетын членже. Тудо тыгак мер пашаште чолган тырша. IX Марий калык погынын делегатшылан сайлалтын, Башкортостан республикын мер палатыжын членже, регионысо «Молодость нации» мер фондын правлений председательже.

Рима Баталова «За заслуги перед Отечеством» IV степенян орден, Келшымаш орден, тыгак «За личное мужество», «За заслуги перед Республикой Башкортостан», Салават Юлаев да моло орден дене наградитлалтын. 2001 ийыште Уфа олан да Шаран районын почётан гражданинже лийын.

Е.ЭШКИНИНА