Картингистна-влак ончыл радамыш логалыныт

Тўрлӧ амаллан кӧра, картингистна-влак кугу таҥасымашке кок ий миен огытыл. Но тиде гана вийыштым тергаш йӧн лектын.
Таҥасымашке Татарий гычат спортсмен-влак толыныт. Нунын техникышт мемнан дечын палын ойыртемалтын – моторыштат куатлырак улмаш, шина-влакат сай фирмын лийыныт. Туге гынат, мемнан рвезына-влак изишат ӧрын огытыл – сай техникан спортсмен-влак дене тӧр каеныт.
«Кадет» классыште районын чапшым Динар Тухбатуллин ден Николай Зандинов араленыт, «Юниор» классыште – Павел Редников, «Национальный» классыште – Данил Зарипов.
Игече йўран лийын да техника кенета пудырген гынат, спортсменна-влак сеҥымаш верч чулымын кучедалыныт. П. Редников, мутлан, картше пудыргымешке, ончыл радамыште лийын, но моторжо вучыдымын йӧрен. Н. Зандиновын картышкыже вес спортсменын картше миен керылтын...
Менан рвезына-влакым кумылаҥдаш ончычсо картингист-влакат миеныт ыле. Мутлан, республиканский таҥасымашын призержо Вадим Салимгареев, Руслан Давлетшин, Сергей Байрамов, Анастасия ден Дмитрий Айдугановмыт Маша да Ваня эргышт дене, Марат Чуприков (тудо картингист-влаклан таҥасымаш кечын эн сай механик лийын), Артур эргыже (тудат картингист ыле) да моло. Нуно чыланат таҥасымаш пытымешке мемнан воктене лийыныт да мыланна кертмышт семын полшеныт.
Тидлан да спорсменна-влакын чолгалыкыштлан кєра ме уда огыл результатым ончыктенна. «Национальный» классыште Д. Зарипов икымше верым налын, «Кадет» классыште Д. Тухбатуллин сеҥен, Н. Зандинов почетан нылымше верым налын. Командына республикыште 3-шо верыш нєлталалтын. Тиде пеш сай результат! Тидлан кӧра спорсменна-влакым сеҥымашышт дене алал кумылын саламлена да ончыкыжым эшеат кугурак сеҥымашыш шуаш тыланена!
Мый образований отдел начальник С. Александровлан, «Путник» йоча-юношеский рўдерын методистше-влаклан таҥасымашыш миен толаш йӧным муаш полшымыштлан, предприниматель Ю. Александровлан водитель ден грузовой транспортым ойырымыжлан, «Путник» рўдерын автобус водительже В. Михайловлан, механик-водитель М. Чуприковлан да тўрлӧ йӧн дене полшышо ача-ава-влаклан чон гыч лекше тау мутым ойлем.
Иван ЯЛАЕВ, «Путник» йоча-юношеский рўдерын картингист-влак ушемже вуйлатыше.