«Аралыше-влак, ончыко» модмаш эртен

«Аралыше-влак, ончыко» модмаш эртен

Модмаш йоча-влак коклаште командный шўлышым вияҥдаш да нунын посна усталыкыштым рашемдаш виктаралтын.

Тушто чылаже 11 команда вийжым терген: Мишкан селасе 1 №-ан лицей, 2 №-ан Мишкан кыдалаш школ, Чорай ялысе марий гимназий, Изи Накаряк, Нерге, Тымбай, Ирсай, Кемий, Пўрӧмучаш, Йылыш, Янагуш ялласе школ-влак. Коронавирусный инфекций (COVID-19) шарлымылан кӧра таҥасымаш график почеш эртен. Модмаште ўдыр-рвезе-влак тўрлӧ текшырымашым эртеныт. А этап-влак тыгай лийыныт: робототехника, чаракан полоса, капитан-влак конкурс, наставник-влак конкурс, ориентирований, экологий, корнышто коштмо безопасность да краеведений конкурс-влак.

Тунемше-влак модмашын чыла этапшымат сайын эртеныт, тидым ышташ икте-весылан полшымаш йӧным ыштен. Йоча-влакын мутышт почеш, мероприятий моткоч оҥай да пайдале лийын. Ӱдыр-рвезе-влак тушто шинчымашышт да чолгалыкышт дене веле огыл, а ик команда лийын моштымышт дене ойыртемалтыныт.

Модмаште Мишкан селасе 1 №-ан лицей сеҥен, кокымшо верым Кемий школ налын, кумшым – Пўрӧмучаш школ. Сеҥыше-влак посна этаплаштат палемдалтыныт.

Сеҥыше команда Мишкан районын чапшым конкурсын зональный этапыштыже аралаш тўҥалеш. Тудо 12 мартыште Мишкан селаште эрта.

Модмашым эртараш полшымыжлан районысо молодёжный политика шотышто комитетлан (О. Биктубаевалан) тау мутым ойлена.

В. АГЛЯМОВА (материалым «Путник» рўдер пуэн).