Идалык сайын тӱҥалын

Идалык сайын тӱҥалын

Районын чапшым Мишкан селасе ДЮСШ-н тренер-преподавательже-влак В. Шамратов ден Н. Апсатарован воспитанникышт араленыт. Нунылан тиде таҥасымаш поснак вучымо лийын да мутым пеҥгыдын кучымым йодын. Вет тымарте, коронавирус кумдан шарлымылан кӧра, тўрлӧ таҥасымаш-влак кужу жап эртаралтын огытыл.

Таҥасымашын икымше кечыштыже 2009-2011 ийлаште шочшо, 2012 ийыште шочшо да изирак йоча-влак вийыштым тергеныт. Эн изи теннисист-влак коклаште икымше – ший медальым Екатерина Михайлова (Мишкан селасе 1 №-ан лицей, тренер-преподавательже Н. Апсатарова) сеҥен налын. Екатеринан уже юношеский разрядше уло. Эрге-влак коклаште эн сайын Алексей Аксаев модын, тудо визымше лийын.

Кокымшо кечат ший медаль дене куандарен - 16 ияш марте ўдыр-влак кокласе юношеский таҥасымаште Дарина Апсатарова (Мишкан селасе 1 №-ан лицей, тренер-преподавательже Н. Апсатарова) ойыртемалтын. Кирилл Шамыков (Тымбай ялысе школ, В. Шамратов туныкта) кандашымше лийын.

Кумшо кече эшеат шукырак куаным конден: 19 ияш марте ўдыр-влак кокласе юниорский таҥасымаште Дарина Апсатарова икымше верым налын, а молодежный таҥасымаште кокымшо лийын. Но теннисисткына тидын дене серлаген огыл – тудо Башкортостан Республикысе таҥасымаште той медальым сулен налын. Эрге-ўдыр мужыр разрядыште Дарина Леонид Байрамалов (Благовещенск ола) дене пырля кумшо лийын.

Тылеч вара ўдыр мужыр-влак посна таҥасеныт. Тыште Дарина Апсатарова Бурай села гыч Дина Якупова дене пырля модын. Нуно финалыште республикын икана огыл чемпионжо лийше мужырым сеҥеныт да шєртньє медальым налыныт.

Чумыр командный зачетышто 2012 ийыште ўдыр-влак команда ден 2006 ийыште шочшо ўдыр-влак командына кокымшо вер-влакым налыныт, 2003 ийыште шочшо ўдыр-влак команда кумшо лийын.

Ме чолга спортсменна ден тренерна-влакым тыгай сеҥымаш дене алал кумылын саламлена, чылаштланат пеҥгыде тазалыкым, суапым да эшеат кугурак сеҥымашыш шуаш тыланена.

Мишкан селасе ДЮСШ посна Дарина Апсатаровам саламла. Тудо Чумыр Всероссийский спорт классификацийын (ЕВСК) йодмашыж ден условийжым тичмаш шуктен да «Спорт мастерлан кандидат» спорт разрядым налын. Тудлан ончыкыжым эшеат кугурак сеҥымашыш шуаш да районнам элна мучко чапландараш тыланена.

Н. АПСАТАРОВА, ДЮСШ-н тренер-преподавательже.