+19 °С
Дождь
СПОРТ
31 Декабря 2020, 21:00
Шах да мат
Тӱнямбалсе шахмат кече вашеш, а тудет 20 июльышто палемдалтеш, «Путник» йоча-юношеский тӱризм рӱдерыште кугыеҥ-влак да 15 ияш марте ӱдыр-рвезе-влак коклаште шахмат дене турнир эртен
Шах да мат
«Путник» рӱдерыште шахмат дене модмаш-влакым 2019 ий шошым эртараш тӱҥалме. Турнирым эртараш социальный сетьла гоч Э. Давлеева йодын.
Элеонора Давлеева Озерка ялын шочшыжо улеш, кызыт У Уренгойышто ила. Тудо школышто тунеммыж годым моткоч шахмат дене модаш йӧратен,
кызыт школышто йоча-влакым тиде модмаш дене модаш туныкта. Э. Давлеева Мишкан селасе кружокышто йоча-влак коклаште модмашым эртараш материал ситыдымым сайын пален, сандене алал кумылын полшаш лийын.
Тыге, 18 июльышто, «Путник» йоча-юношеский туризм рӱдерыште шахмат дене турнир эртен. Шахмат – чытышан, тӱткӧ улшо да пӱсӧ уш-акылан еҥ-влакын модмашышт. Тидым шахматист-влак чыланат сайын палан. Тидлан кӧра самырык спорстмен-влакат икымше йоҥылыш деч вара модмыштым кудалтен огытыл да сеҥымаш верч пеҥгыдын кучедалыныт. Туге гынат, сеҥыше-влакат, сеҥалтше-влакат лийыныт. Спортышто молыча ок лий.
Ветеран-влак коклаште Е. Малмыгин сеҥен, кокымшо верым И. Имаев налын, кумшым – В. Шамаев. 15 ияш рвезе-влак коклаште М. Давлеев икымше верым налын, М. Ашиев кокымшо лийын, Р. Шамсутдинов – кумшо.
Сеҥыше-влакым медаль да диплом дене палемдыме. Молыштым – турнир нерген ушештарыше изирак приз дене. Модмашын эн изи участникше-влаклан блокнот-влакым кучыктымо.
«Шахмат – акрет жапысе, уш-акылым пӱсемдаш полшышо модмаш. Сандене йоча-влаклан чылаштланат тиде модмаш дене модаш тӱҥалаш тыланем. Вет шахмат айдемым чытышан, тӱткӧ, яндар уш-акылан лияш туныкта.
Мый шкеже вич икшыван ава улам. Икшывем-влак чыланат шахмат дене модыт, сандене тиде модмашын пайдажым сайын палем», – ойла Э. Давлеева.
«Путник» йоча-юношеский рўдер ончыкыжымат тыгай турнир-влакым эртарен шогаш тӱҥалеш. Вет шахмат дене модмаш айдемын койыш-шоктышыжым
тапта да пеҥгыдылыклан туныкта.
В. КАМИЛЯНОВ.
