Оралтысе футболын финальный модмашыже-влак

Оралтысе футболын финальный модмашыже-влак

Тудо районышто 1 июньыштак стартым налын. Модмаш-влакым «Единая Россия» партийын верысе отделенийже образований отдел, йоча-юношеский спортивный школ полшымо дене организоватлен.

Йоча-влак тиде кечым чон вургыж вученыт. Модмашым сайын эртараш игечыжат келшыше лийын. Лигын финалышкыже лекшаш верч Мишкан гыч «Олимп» команда Татарбайын «Батыр» командыж дене вашлийын, Мишкан гычак «Олимп - 2» команда Ирсай ялын «Ирсай-влак» команда дене вашлийын. Полуфиналыште модмаш деч вара икымше вер верч «Олимп» ден «Ирсай-влак» вашлийыныт, кумшо вер верч «Батыр» ден «Олимп - 2» модыныт.

Тиде вашлиймаште «Олимп» (тренер В. Каляев) сеҥышыш лектын, «Ирсай-влак» ший призер лийыныт. Той медальым «Батыр» налын.

Чыла модмашым иктешлыме деч вара тӱрлӧ номинацийлаште эн сай модшо-влак палемдалтыныт. «Эн сай вратарь» Артем Асмаев («Олимп» команда) лийын, «Эн сай бомбардир» - Максим Матюхов («Олимп»), «Эн сай нападающий» - Владимир Минилбаев («Олимп»), «Эн сай защитник» - Виталий Васильев («Ирсай-влак»).

Модмаш-влак эртымеке, оралтысе футбол фестиваль торжественно петыралтын. Сеҥыше да призер-влакым саламлаш «Единая Россия» партийын верысе отделенийын секретарьже Т. Коледина, образований отдел начальник С. Александров, «Единая Россия» партийын верысе отделенийжын исполнительный секретарьже С. Исмагилова толыныт.

Верысе отделенийын призшылан футбол турнирым кажне ийын эртараш пунчалме. Йоча-влакым таҥасымаш пытыме дене тӱҥ судья В. Каляев саламлен. Команде-влаклан да нунын наставникыштлан дипломым, тауштыме серышым, кубокым да медальым кучыктымо.

«Единая Россия» партийын «Оралтысе футбол лигын» муниципальный этапыштыже сеҥыше-влакым уло кумылын саламлена! Зональный модмаште сеҥымашым тыланена!

С. ИСМАГИЛОВА, верысе отделенийын исполнительный секретарьже.