Ечым чылан йӧратат

Ечым чылан йӧратат

Тиде кечын чумыр район гыч уста спортсмен ден ече дене кошташ йӧратыше-влак шукын чумыргеныт.

Таҥасымашын условийже почеш спортсмен-влак ийгот шот дене тӱрлӧ тӱшкалашке шеледалтыныт. Ечызе-влак старт тӱҥалме деч ончыч ече трассым шымлен лектыныт.

Игечыже изишак йӱштырак лийын гынат, участник-влакын кумылышт локтылалтын огыл. Нерым чывышталаш тєчышє мардеж нунылан утларак писынрак куржаш вийым гына ешарен. Теве таҥасымаш тӱҥалме нерген фанфар йӱк шижтара. Участник-влак радамын шогалыт. Районысо спорткомитетын председательже Р. Ямаев спорт- смен-влакын ече корныш лекташ ямде улмышт нерген район администраций вуйлатышын заместительже Л. Александровалан докладым ышта.

Муниципалитетын представительже Лариса Геннадиевна ты лӱмлӧ событий дене чылаштым саламлен да сеҥымашым тыланен. Саламлымашке муниципальный район Советын председательже С. Александров, спортын ветеранже С. Салякин да молат ушненыт.

Таҥасымашым эн самырык участник-влак почыныт. Нуно шке дистанцийыштым чыланат сайын эртеныт. Варажым ветеран-влак вий-куатыштым текшыреныт. Сай результатым ончыктеныт. Виб-куржмашке верысе тєра-влак - сельский поселений администраций вуйлатыше, школ директор да молат лектыныт.

Тиде гана райбольницын, агроколледжын, образований отделын, библиотекын командышт эн кугу лийыныт.

Сеҥыше-влак почетный грамотым, медальым налыныт. Ечыгорнышто сеҥалтше лийын огыл, кажне участник вий-куатым ешарен.

Кумылан-влак «Триумф» ФОК-што таҥасымаш деч вара шокшо чайым йӱын кертыныт.

Вениамин КОНДОГИН.