Ече сезон петыралтын

Ече сезон петыралтын

Ече сезон петыралтме лӱмеш эртарыме мероприятий годымат кече моткоч леве шоген, но тудо пайремым эртараш нимогай чаракым ыштен огыл.

Корнышто асфальт шукерте ончыч почылтын гынат, чодыраште эше теле озаланен. Сабантуй олыкыштат лум киен.

Теле сезоным петырымашке пеш шуко ечызе погынен. Нуно чыланат леве кечылан келшыше амуницийым, ече мазьым конденыт да ямдылалташ тӱҥалыныт.

Пытартыш таҥасымаште чыланат сайрак результатым ончыкташ тыршеныт. Нунын коклаште самырык-влакат, илалше-влакат лийыныт. Нуным ончен, кӧранаш веле кодын. Тора гыч самырык ден илалше-влакым ойыраш моткоч неле – кӱчык дистанцийым чыланат мардеж гай писын куржыт. Но ече дене куржмаш ӧрдыж гычын гына куштылгын коеш – ечым шке чиет гын, шӱлыш пеш писын йомеш. Дистанцийым писын эрташлан ятыр ий ямдылалтман але чолга да самырык лийман.

Теве построенийышке сигнал йоҥгалте. Спортмен-влак чыланат радам дене шогальыч. Нуным ече сезон петыралтме дене Мишкан район муниципальный район администраций вуйлатышын заместительже Л. Александрова саламлыш. Лариса Геннадиевна теле гочлан ик таҥасымашымат ӧрдыжеш ок кодо, мероприятийыш ончаш гына огыл мия – шкежат ече дене чулымын коштеш.

Чолгалыкышт дене тыгак образований отдел вуйлатыше С. Александров, районысо спорт комитетын председательже Р. Ямаев,

спортын ветеранже С. Салякин ойыртемалтыт. Сергей Салякин тиде кечын эше ик гана рашемден – ече дене 70 ий наре арам коштын огыл. Тудо эше чулым улеш да ече дене южо самырык дечын писынрак куржеш.

Кече леве шоген гынат, таҥасымаш сайын эртен. Эр юалге спортсмен-влаклан ешартыш вийым пуэн, тидлан кӧра финишыш

чыланат писын пӧртылыныт. Ойыртемалтше-влакым Чап грамота да медаль дене палемдыме.

Вениамин КОНДОГИН.