Курымашлык шарныктыш

Тудо Верысе инициативылан полшымо программа дене шочын. Ты проектым илышыш шыҥдараш 600 тўжем теҥге окса ойыралтын. Тушечын 444 тўжем
600 теҥге - республикын бюджетше гыч, 66 тўжем 400 теҥге - районын бюджетше гыч. 44 тўжем 500 теҥгем калык поген, 44 тўжем 500 теҥгем спонсор-влак пуэныт.
Памятникым почаш да йошкар тасмам пўчкаш район администраций вуйлатышын финанс йодыш шотышто заместительже, финанс управленийын начальникше З. Шамсутдиновалан, Кўрзе сельсовет сельский поселений вуйлатыше Ю. Андреевалан, Мишкан да Бурай районласе военный комиссар С. Васильевлан
ўшаненыт.
- Тиде - исторический проект. Таче ме Памаш ялыште Кугу Отечественный сарын участникше-влаклан памятникым почына, - каласен Сергей Шуматович.
- Тиде нунын курымашлык подвигыштым пагалымаш. Сеҥымаш майлан 76 ий эртен, ту жапысе еҥ-влак кечын шагалемыт. Памаш ялыште ик ветеран гына ила. Тиде - 96 ияш Павел Байметов.
Кўрзе сельсовет сельский поселений вуйлатыше Ю. Андреева Башкортостан Республик правительствылан, Мишкан район администрацийлан ты проектым
илышыш шыҥдараш полшымыштлан кугу таум каласен. Тыгак сельский поселенийыште илыше-влакым да спонсор-влакым тауштен.
- Мемнан ялыште илыше-влак эше ик гана пеҥгыдемденыт, тўшка вий дене кеч-могай проблемымат решатлаш лиеш, - каласен Юлия Вильевна. - Инициативный
группа ППМИ программым икымше гана огыл илышыш пурта.
Тыгай пашам шуктымо опыт погынен. Тыгак палемден кодыман, калык ден власть органын ваш келшен ыштыме пашан лектышыже раш коеш. Мый ончыкыжымат
калыкын полшымыжо дене шуко пашам ыштен кертына манын ўшанен кодам.
Тиде лўмлӧ событий дене погынышо-влакым инициативный группын председательже Ю. Адылбаев саламлен. Погынышо-влак Кугу Отечественный сарыште колышо-влакым ик минут шып шоген шарналтеныт. Вара памятник деке пеледышым пыштыме. Тиде пашам шуктымаште тыршыше-влаклан район администрациий вуйлатышын финанс йодыш шотышто заместительже, финанс управленийын начальникше З. Шамсутдинова, Кўрзе сельсовет сельский поселений вуйлатыше Ю. Андреева, «Единый Россий» партийын Мишкан районысо исполнительный секретарьже Н. Шамшиева Тауштымо серыш-влакым кучыктеныт.
Светлана ТОЙМУРЗИНА.