Мемнан порысна – шарнымашым аралаш…

Мемнан порысна – шарнымашым аралаш…

Нине ийла нерген мый тўрлє фильм, литературный произведений, патриот урок-влак гоч палем. Музейлаште аралалтше арвер-влакат жапым шижаш да умылаш полшат.

Сар нерген мылам тыгак ачам ден авам шуко ойленыт. Нуно нине ийла нерген кочашт да кувавашт дечын колыныт.

1941 ий 22 июньышто Мишкан районышто Сабантуй пайрем эртен. Калык олык тич шошо ага паша пытымым палемдаш погынен, но шучко увер пайрем ден тыныс илышым кенета лугыч ыштен – элышкына Гитлер вуйлатыме Германий керылтын пурен. Тушманлан карум пуашлан уло элна дене чумыргаш, икоян лияш да уло вийым пышташ пернен. Сеҥымаш верч мыйын кугезе кочам ден кугезе кувавам-влакат надырым пыштеныт. Яков Тоймурзинович Тоймурзин ден Ермолай Ярметович Ярметов элнан эрыкше верч фронтышто кредалыныт. Ты жапыште нунын ватышт – Мария Байрамовна ден Менсыле Валитовна тылыште тыршеныт: колхоз пасушто пашам ыштеныт – куралыныт, ӱденыт, лектышым погеныт... Яра жапыштышт носким, пижым пидыныт да фронтышко посылка дене колтеныт. Ты жапыштак шке икшывыштым ончаш кўлын. Кочам, Александр Тоймурзин, 1941 ийыште кок ияш гына лийын.

Яков Тоймурзин кугезе кочам 1918 ийыште Кемий ялыште шочын, сар тӱҥалмеке, фронтыш каен, мӧҥгеш 1945 ийыште пєртылын, воинский званийже – рядовой. Тудо 2001 ий марте 89 ий илен.

Авамын кочаже, Ермолай Ярметович, Пайтара ялын шочшыжо улеш. Тудо 1913 ийыште шочын. Сар тӱҥалмеке, фронтыш каен, ик кредалмаште нелын сусырген. Мӧҥгеш 1945 ийыште пєртылын. Воинский званийже – рядовой. Ермолай Ярметович 1985 ий марте илен. Сеҥымашлан 40 ий темме кече марте ик тылзым гына илен шуктен огыл.

Раиса Ермолаевна кувавам 1955 ийыште шуко икшыван Ярметовмыт ешыште шочын.

Тений, 2020 ийыште, мемнан ешна ятыр юбилейым палемда. Мый 15 ияш лиям, кувавам – 65 ияш. Чыланат пырля Кугу Сеҥымашлан 75 ий теммым палемдена. Мыланна тиде кече чылаланнат моткоч шерге. Тиде кече кочана, кувавана, кугезе кочана да кугезе кувавана-влакым шарналташ эше ик амал улеш.

Мишкан селаште 9 май лӱмеш митинг Сеҥымаш мемориал воктене идалык еда пеш торжественно эрта. Тиде кечын сар жапысе да сар нерген муро-влак йоҥгалтыт, мемориал воктене ятыр еҥ погына, еҥ-влак икте-весыштым пайрем дене саламлат. Ончыл верыште эре Кугу Отечественный сарын ветеранже-влак улыт, но, чаманаш кодеш, нуно моткоч шагалын кодыныт да чыланат пайремышке миен огыт керт. Вич ий почела ме «Колыдымаш полкын» участникше ыльна. Тушко кочана але кугезе кочана-влакын фотошт дене миена. Тыге ме нунын подвигышт нерген шарнымашым аралена.

Мый эше кок кугезе кочамын лўмыштым палем. Наталья Сергеевна кувавамын ачаже Семниев Сергей Семниевич лийын. Тудо Тӧргымтӱр ялыште шочын-кушкын, сар тӱҥалмеке, фронтыш каен, Белоруссийыште колен.

Салмияров Шамшияр Салмиярович 1910 ийыште Йошкар Памаш ялыште шочын. Тудо пулеметчик лийын, 75-ше стрелковый дивизийын 34-ше стрелковый полкыштыжо кредалын. Мӧҥгеш 1946 ийыште пєртылын. Воинский званийже – рядовой. Шамшияр Салмиярович Отечественный сарын II степенян орденже дене палемдалтын. 1986 ий марте Йошкар Памашыштак илен. Тудын шӱгарлаштыже йошкар шӱдыран памятникым вераҥдыме.

Антон ТОЙМУРЗИН, Мишкан селасе 1 №-ан лицей, 8 Б класс.