Ме ачана дене кугешнена

Ме ачана дене кугешнена

Фашистский Германий вучыдымын мемнан элыш керылт пурымеке, Мишкан район гычат тӱжем дене еҥ шочмо элым аралаш каен. Нунын коклаште мемнан ачана - Ильтубай Биктубаевич Биктубаев лийын.

Тудо шке илышыжым чаманыде, тушман ваштареш лӱдде кредалын. Кок гана сусырген. Тушман ваштареш кредалмаште лўддымылыкым ончык- тымылан «За отвагу», «За оборону Ленинграда», «За Победу над Германией» медаль-влак, III степенян Чап орден, I степенян Отечественный сар орден да юбилейный медаль-влак дене наградитлалтын.

Мемнан ачана 1910 ий 10 сентябрьыште Мишканыште шочын. Авана, Пайсуло Шаркаевна дене нуно ик села гыч лийыныт. Нуно 1936 ийыште мужыраҥыныт. Тиде ийынак, родо-шочшыжо-влак полшымо дене, ачана у пӧртым чоҥен. Тунам ту верыште чара пасу лийын, а кызыт Спортивный урем. Ача-авана вашла йӧратен, икте-весым пагален иленыт, колхозышто пашам ыштеныт.

Ачана уста плотник лийын. 1933-1936 ийлаште действительный военный службым посна кӱртньӧ корно батальонышто эртен.

Нунын ешыш сар вучыдымын пурен. 1941 ий 22 июньышто ачанам военкоматыш ўжыктеныт да фронтыш колтышаш еҥ-влаклан повесткым шалаташ колтеныт. А шкенжым июль тӱҥалтышыште армийыш налыныт. Тудын Русен ден Русек шольыжо-влакымат фронтыш налыныт. Коктынат шочмо эл верч вуйыштым пыштеныт.

Ачана запасной кавалерийский полкыш логалын, тудын составыштыже ик ий утла служитлен. Варажым 934-ше стрелковый полкыш кусареныт. 1943 ий январь тылзыште йолжо нелын сусырген. 1943 ий май марте госпитальыште эмлалтын. Госпиталь деч вара 511-ше стрелковый полкышто отделений командир лийын. 1944 ий сентябрь марте тушман ваштареш лӱдде кредалын, вара адак сусыр. Тиде гана мӱшкыр эмганен. Кужун эмлалтын. Сеҥымаш кечым госпитальыште вашлийын.

Ачана Москвам, Ленинградым аралымаште, Курский дугаште, Польшым утарымаште кредалын. 1945 ий 18 майыште демобилизоватлалтын.

Ачана пеш поро, еҥым пагалыше, моткоч шотан айдеме лийын. Ме тыгай ачана дене кугешнена!

Биктубаевмыт, Ионовмыт, Николаевмыт, Янситовмыт, Шамыкаевмыт.