Ирсайыште Сеҥымаш парад эртен

Ирсайыште Сеҥымаш парад эртен

Коронавирус шарлымылан кӧра, тений Кугу Отечественный сарыште Сеҥымашлан 75 ий темме лӱмеш мероприятий-влак кугун эртен огытыл. Мемориал воктеке пеледыш аршашым пыштымашкат икмыняр еҥ гына миен, Сеҥымаш парадыштат техника гына участвоватлен, тудо ветеран-влак илыме уремлаште гына эртаралтын.

Кугу Отечественный сарын ик ветеранже, Алей Семенович Семенов, Ирсай ялыште ила, тидлан кӧра парад тиде ялын ик уремже дене эртен. Парад вашеш уло урем тӱзаталтын да Россий флаг-влак дене сӧрастаралтын, пайрем вашеш урем мучко ломбо-влакат пеледаш тӱҥалыныт. Икманаш, ял уремыште моткоч мотор да ямле лийын. Уремышке эрок, немыч кашак дене кредалше кочаштын але кугезе кочаштын портретыштым кучен, пайрем вургемым чийыше калык лектын шогалын - «Колыдымо полк» тений тыгай сынан лийын. Алей Семеновичат эрок йол ўмбалне лийын, тудо парад лишеммым рыҥ шоген вучен.

Ик жап гыч ял мучаште пайрем колонна койын. Вашке машина-влак ветеранын пєртшє воктеке толын чарненыт. Алей Семеновичым пайрем дене Мишкан да Бурай районласе военный комиссар С. Васильев, Ирсай сельсовет сельский поселений администраций вуйлатыше С. Хазиев да моло саламленыт. Саламлымаш деч вара пеледыш аршаш ден пєлекым кучыктеныт. Тылеч вара культура пашаеҥ ден волонтер-влак «День Победы» мурым йоҥгалтареныт.

Ветераным жаплымаш деч вара колонна ял урем дене умбакыже тарванен.

В. КАМИЛЯНОВ.