«Ший памаш» Фонд 2021-2022 ийлалан самырык автор-влаклан Марий Элын калык писательже Вячеслав Абукаев-Эмгак лўмеш сылнымут конкурсым увертара

Конкурсын тўҥ шонымашыже:

– шочмо йылме ден сылнымут полшымо дене самырык авторын (кыдалаш да кўшыл школышто тунемшын, тыгак кумда илыш корныш икымше ошкылым ыштышын) чон арулыкшым аралаш;

– кӧргӧ чон куатшым пеҥгыдемдаш;

– шинчымашыжым кумдаҥдаш;

– йылме усталыкшым вияҥдаш.

Конкурс В.Абукаев-Эмгакын тыгай ўжмутшо дене эрта: «Таче возымет теҥгечысе деч сайрак лийшаш!»

Конкурсын ыштышаш пашаже:

– серыме пашалан кумылан ўдыр-рвезе-влакым чумыраш;

– сылнымут полшымо дене рвезе еҥлан шочмо калыкнан историйжым, йылмыжым, тўвыражым да философийжым аклаш йӧным ышташ;

– сылнымут гоч рвезе еҥын тўня умылымашыжым кумдаҥдаш;

– сылнымут дене шўлышӧ пиалан айдемым кушташ;

– самырык еҥлан усталыкшым вияҥдаш йӧным ышташ;

– ончыкылык сылнымутчо ден журналист-влакым кушташ.

Конкурсым эртарыше-влак:

– «Ончыко» сылнымут да мер-политике журнал: 424006, Йошкар-Ола, Панфилов урем, 39. Тел.: 45-34-64;

– «Марий Эл» газет: 424006, Йошкар-Ола, СССР Вооружённый Вийын 70-ше идалыкше урем, 20. Тел.: 49-55-11;

– самырык-влаклан «Кугарня» газет: 424006, Йошкар- Ола, СССР Вооруженный Вийын 70-ше идалыкше урем, 20. Тел.: 45-43-72;

– «Кече-Солнышко» йоча журнал: 424006, Йошкар-Ола, Панфилов урем, 39. Тел.: 64-19-33.

Серымылан акым редколлегий пуа:

1. В.В.Краснов, поро кумылым ончыктышо «Ший памаш» фондым вуйлатыше;

2. Л.А.Абукаева, филологий науко доктор, Йылмым, сылнымутым да историйым научнын шымлыше В.М.Васильев лўмеш Марий институтын дисциплине-влак кокласе шымлымаш лабораторийжын тўҥ научный пашаеҥже;

3. А.С.Абдулов, «Марий Эл» газет» ООО-н директоржо - тўҥ редактор, историй науко кандидат;

4. С.Д.Архипова, «Кече» журналын тўҥ редакторжо, Россий писатель ушемын Марий Элысе пӧлкажым вуйлатыше, поэт;

5. Г.Ф.Гордеев, Марий самырык театрын сылнымут пєлкажым вуйлатыше, писатель, драматург;

5. Э.А.Иманаев, «Кугарня» газет» ГУКП-н директоржо - тўҥ редактор;

6. В.А.Кольцов, ВГТРК-н «Марий Эл» ГТРК филиалжын радиовещаний службыжын начальникше;

7. М.И.Матвеев, Марий Эл Республикысе тўвыра, савыктыш да калык паша шотышто министрын алмаштышыже;

8. Ю.И.Соловьёв, «Марий книга издательстве» савыктыш пӧрт» ГУКП-н директоржо, прозаик, драматург;

9. Г.Л.Сабанцев, Марий Элын калык поэтше;

10. И.Г.Попов, «Ончыко» журналын тўҥ редакторжо, поэт.

Автор-влакын серымышт тыгай йыжыҥла дене аклалтыт:

– эн сай поэзий – «Кинде-шинчал» премий;

– эн сай прозо – «Ошкеча» премий;

– эн сай драматургий – «Кайыккомбо кашта» премий;

– эн сай журналист паша – «Почылтшо чон» премий;

– эн сай теле-, радиожурналист паша, блогер – «Канде толкын» премий.

Конкурсын эртыме радамже:

– конкурсыш Россий Федерацийыште илыше, марла серыше кажне самырык еҥ (35 ий марте) ушнен кертеш. Нуно, жанрым шотыш налын, пашам ыштышаш улыт;

– автор шке возымыжым (компьютереш поген печатлымым; 1 экз.) «Ончыко» журнал але «Марий Эл» да «Кугарня» газет редакцийлашке «В. Абукаев-Эмгак лўмеш конкурсыш» палемдымаш дене колта;

– редколлегий автор-влак дене пашам ышта. Тыгодым кугу тўткышым авторын мутвундо поянлыкшылан, марла ойым, сылнымут произведенийын кышкаржым чын чоҥен моштымылан ойыра;

– 1 ноябрь гыч 1 декабрь марте автор фондын вуйлатышыж лўмеш йодмашым сера. Йодмаш дене пырля анкетысе йодышлан вашешта. Газет ден журналлаште савыкталтше сылнымутшым але книгажым редколлегийлан аклаш темла. Документым «Ончыко» журнал редакцийыш (424006, Йошкар-Ола, Панфилов урем, 39-ше пӧрт) кондыман;

– конкурс Йошкар-Олаште Марий Элын калык писательже Вячеслав Абукаев-Эмгакын шочмо кечыжым палемдыме годым (декабрь мучаш) иктешлалтеш;

– конкурслык роскотым фондын вуйлатышыже В.Краснов палемден. 2021-2022 ийласе фонд – 100 тўжем теҥге;

– сеҥыше-влаклан диплом ден окса премий (20 тўжем теҥге дене) кучыкталтыт.

Пашада ушныжо, йолташ-влак!

Оргкомитет.