Жап мемнам ойырен налын

Жап мемнам ойырен налын

Тиде событий лӱмеш ялысе библиотекыште «Жап мемнам ойырен налын» лӱман лӱддымылык урокым эртарыме.

Урок тӱҥалтыште вӱдышӧ С. Мишингина погынышо-влакым афган сар дене палдарен, совет салтак-влакын лӱддымын кредалмышт нерген ойлен, «Афганистан – шарнымаш да чон коржмаш» тематический выставкым ончыктен.

Мероприятийышке верысе воин-интернационалист Эдуард Николаевич Михайловым ӱжмӧ. Тудын ойлымыжым колыштмеке, погынышо-влак чыланат тиде сарыште вуйыштым пыштыше землакна-влакым – Анатолий Илаевич Илинбаевым, Вячеслав Емельянович Муртазиным, Валерий Данилович Яметовым тып минут дене шарналтеныт да нунын лӱмеш посна сортам чӱктеныт. Тылеч вара тӱҥалтыш класслаште туныктышо И. Шайдарова В. Верстаковын «Горит звезда над Кабулом» почеламутшым лудын.

Афган сарын участникше Эдуард Николаевич Михайлов шуко икшыван ешыште шочын-кушкын, Ирсай кыдалаш школым тунем пытарен да Пӱрӧ оласе 31-ше СПТУ-ш тунемаш пурен.

Тракторист-водитель профессийым налын, кеҥежым шочмо ялыштыже практикым эртен, а 1986 ий ноябрьыште армийыш каен. Арменийысе Кировокан олаште подготовкым эртымеке, Афганистаныште служитлен, Пулихумри оласе дорожно-комендантский частьышке логалын. Тиде часть Термез гыч Кабул марте корным эскерен. Эдуард БТР-ын механик-водительже лийын служитлен.

Нуно нине ола-влак коклаште коштшо 70, 1000 да утларак машина гыч шогышо, боеприпас, медикамент, продуктым шупшыктышо колонна-влакым тушман-влак деч араленыт.

- Верысе калык... нунын нерген мом каласаш лиеш? Тыглай айдеме семынак койыныт. Вашлиймышт годым вуйыштым савеныт, коклан воштылалыныт. А йўдым шукын кидышкышт шылтен пыштыме автоматым налыныт да засадым ыштеныт. Мемнан ваштареш.

Тыгак ик эн кугу тушманна чыташ лийдыме шокшо лийын. Кечывалым курык кӱ-влак кучаш лийдымын ыреныт, чӱчкыдын нылле градус дечынат шокшырак игече шоген. Юалгым йўдымат шижме огыл. Тидлан кӧра ночко простыняшке пўтыралтын маленна, - палдарен шкенжын службыж нерген Эдуард Николаевич.

Эдуард Михайлов Афганистан гыч лач 15 февральыште Келшымаш кӱвар гоч ик эн пытартыш радамыште лектын. Йоча-влак тудын ойлымыжым лым лийде колыштыныт да ятыр йодышым пуеныт.

С. МИШИНГИНА.