Юзо еҥ

Юзо еҥ

Пўнчер ялыште юзо еҥ ила. Кажне ийын у ий вашеш тудо ий гычын Йўштӧ кугызам, Лумўдырым да моло фигура-влакым, ий курыкым ышта. Йоча-влак тиде курык гыч кечымучко мунчалтат, а кастене самырык-влак дискотекышке чумыргат.

Юзо еҥын лўмжӧ – Владимир Кутлубаев. Тудо чынжымак шӧртньӧ кидан улеш, кеч-мом чоҥенат, олмыктенат мошта. Ватыж дене коктын ялысе магазинын озаже улыт. Йомак олам лач тудын воктене ыштат. Магазиныште ватыже ышта, икшывышт-влак уже кугу улыт. Владимир Кутлубаев йоча ден кугыеҥ-влаклан тыгай пєлекым ынде икмыняр ий почела ышта.

- Ме тиде ешлан поро пашаштлан тау мутым ойлена, - таушта ялыште илыше Марина Васильева. – Нуно У ий вашеш шўм-чонышкына пайрем шўлышым да куаным пуртат. Таза да эсен лийышт!

Фирдаус КАДИКОВА.