Юзо ӱдыр-влак

Юзо ӱдыр-влак

Шошо тӱҥалтыште ӱдырамаш пайрем вашеш «Камильфо» кафе-рестораныште ӱдыр-влак шке шотан «девичникым» эртареныт.

Тышке еҥ-влаклан моторлыкым пӧлеклыше уста ӱдыр да ӱдырамаш-влак чумыргеныт. Кӧмыт вара нуно улыт, юзо кидан мастар-влак?

Альбина Сабирова - ӱпым, шинчапуным, кӱчым сӧрастарыше. Тиде кастене тудо кум ӱдырым шке мастарлыкше дене куандарен шуктен.

Гульнара Карамова - шинчапун дене пашам ыштыше мастар. Тудо кок ӱдырамашлан моторлыкым пуртен, иктын шинчапунжым кужемден. А тидыже куштылго огыл.

Ульяна Небогатикова - уста фотограф да художник. Тиде кастене тудо пеш шуко сылне фотосӱретым ыштен шуктен.

Динара Хизяева - флорист. Тудын пашажым мишкан-влак сайын палат да йӧратат. Тудо ты кастене ойыртемалтше пеледыш аршаш ден композиций-влакым ыштен.

Лиана Исламшина - шӧртньӧ кидан айдеме, кеч-кушто пашам тӱҥалеш гынат, чыла вере сомылжо умен толеш. Тудо визажист, парикмахер, массажист. Тудын куштылго кидше дене тиде кастене икмыняр ӱдыр эше моторракыш савырнен.

Олеся Андреева - маникюр да педикюр, визажист, шинчапун да ӱп дене пашам ыштыше мастар. Тудын шыма кидшым шуко ӱдыр пала.

Тиде пайрем кастене кум ӱдырын образшым чылт вашталтен кертын.

Альбина Фатхинурова - косметолог, фигурым тӧрлышӧ да шугаринг мастар. Мероприятий годым ӱдыр-влак кидыштышт юзо маскыжым

шижыныт, а икмыняржылан Альбина кидлан да чурийлан массажым ыштен.

Анжела Мишина - флорист, мероприятийым оформитлыше, моткоч уста ӱдыр. Тудын кидше йымач мотор композиций-влак шочыт.

Касым Резеда Бадамшина вӱден. Тудо тӱрлӧ мероприятийым эртарыме дене гына ок серлаге, тортым да тӱрлӧ десертым кӱэшташ йӧрата.

Мутат уке, чыла тиде ӱдыр пайремым «Камильфо» кафе-ресторанын директоржо Кира Шамиданова организоватлен.

Уста, самырык, мотор ӱдыр-влакым ончаш куанле лийын. Кажныжын чурийыштыже шке пашажым йӧратымыже, илышым моторракым

да сӧралракым ышташ кӱлмӧ кумылжо койын. Пайрем касым «Diamond Kids» группын ӱдыржӧ-влак сӧрастареныт. Нунын моторлыкышт да сылне йӱкышт шуко еҥын чонжым савырен. Лина Саетгарееват мероприятийын участникше-влакым сольный номерже дене куандарен. Тиде пайремыште Марсель Салимов пӧръеҥ кокла гыч шкетын лийын. Тудо ӱдыр-влаклан йӧратымаш да ӱдырамаш-влак нерген муро-влакым пӧлеклен.

Чаманаш веле кодеш, Мишканыште эше тыгай оҥай мероприятийлашке еҥ-влак кошташ тунемын огытыл. Вет южгунам тушто улметшак пайрем шӱлышым вашталтен кертеш. А ӱдыр-влаклан мо кӱлеш? Йӧратымаш, азапланымаш, жапым ойырымаш, а вашешыже мемнан

чоныштынат йӧратымаш шукырак лиеш.

Н. КАШИЕВА.