Юбилей дата вашеш

Юбилей дата вашеш

Афганистан гыч совет войскам лукмылан 30 ий темме вашеш афган сарын ветеранже-влак коклаште военно-спортивный зональный таҥасымаш сборный команда-влакым иктыш чумырен.

Лўйкалымаш чарныме дене пырля сар ок чарне. Тудо сарыште лийше-влакын чоныштышт умбакыже шуйна. Лу ий жап шуйнышо сарыште совет армий 15 тӱжем еҥым йомдарен, 35 тӱжем салтак сусырген, 300 еҥ увер деч посна йомын. Башкортостан гыч афган сарыште индеш тӱжем утла самырык салтак кредалын, 300 наре еҥже тушан вуйжым пыштен.

Балтачыште афган сарын ветеранже-влакын вашлиймашышт таза илыш-йӱлам шыҥдараш, боевой действийын ветеранже да инвалидше-влакым физически шуараш, самырык тукымым патриотически воспитатлаш виктаралтын.

Таҥасымаште Киги, Аскын, Мишкан, Балтач, Татышле, Бурай да Караидель районласе команда-влак участвоватленыт. Команда-влакым саламлаш да кумылаҥдаш пагалыме уна-влак толыныт: «Российский союз ветеранов Афганистана» общероссийский мер организацийын Башкортостанысе региональный отделенийын председательже Дмитрий Глушко, Балтач районын вуйлатышыже Ильгиз Субушев да верысе администрацийын представительже-влак.

Район администраций вуйлатыше саламлымашым ойлымыж годым афган сарын участникше-влак нерген шуко поро мутым ойлен да самырык тукым нунын подвигыштым палышаш манын палемден.

Спортивный таҥасымашын программыже оҥай лийын. Физкультурно-тазартыме комплексыште команда-влак визитный карточка дене тӱҥалыныт, вара пневматический винтовка дене лӱйкаленыт, корзиныш мечым кышкеныт, АК-74 автоматым рончен-погеныт, дартс дене модыныт да канатым шупшыныт. Лач канатым шупшмаште мемнан командым нигӧ сеҥен кертын огыл.

Мемнан районын командыштыже районышто афган сарын ветеранже-влак организацийын председательже Венер Фатхинуров, Гадиф Бикбулатов, Данил Илинбаев, Василий Бикбаев, Виталий Имакаев, Александр Дмитриев лийыныт.

Балтачыште афганец-влак воин-нтернационалист-влаклан шогалтыме памятник воктеке пеледышым пыштеныт да шарнен илаш тӱшкан фотографироватлалтыныт. Боевой действийын участникше-влаклан Балтач районысо Культура дворецын артистше-влак концертым ончыктеныт.

Пайрем мероприятий банкет дене иктешлалтын.

О. БИКТУБАЕВА.