Йошкар-Ола порын вашлийын

Йошкар-Ола порын вашлийын

Журналист-влак мийымекечын эрлашыжым Шернур районыш экскурсий дене миеныт. Тушто Шернур сыр комбинатым, каза ферма-влакым онченыт. Шернурышто лукмо каза шӧр гыч ыштыме сыр Марий Элын брендшылан шотлалтеш. Комбинатын кок каза фермыже уло, кажныштыже 1200 дене казам да шорык-влакым ашнат. Вольыкым кўтылымє деч моло чыла пашаже автоматизироватлалтын. Казамат, шорыкымат кечеш кум гана лӱштат. Лӱштымӧ аппарат-влакым Италий гыч конденыт. Сыр комбинатыштыже 250 еҥ да фермылаште 250 еҥ пашам ыштат.

Ыштен лукмо продукцийыштым Марий Эл воктенсе регионлашке, Москвашке, Санкт-Петербургыш колтат. Кызыт Китайыш колташ

договорым ямдылат. «Пятерочка» магазин-влак сетьыш колтат. Икманаш, Шернур район шке сырже дене Россий мучко чапланен.

Ты кечынак Йошкар-Олаште вес кугу мероприятий эртен. Художественный галерейыште 2020 ийлан финн-угор тӱнян культурный столицыжым налшаш верч финальный конкурс эртен. Тидын нерген ме кӱчыкын газетнан кодшо номерыштыже возенна ыле. Мишкан район нерген презентацийым эртараш мемнан район гыч Родион Плотников да Уфа ола гыч йолташна-влак Алена Гайнетдинова ден Максим Тимершин миеныт. Конкурсын финальный этапыштыже кум претендент лийын. Эстоний гыч кок волость да мемнан Мишкан. Жюри составыште финн-угор калык-влакын молодежный ассоциацийын председательже Кяби Суви (жюри председатель), МАФУН-ын членже Эда Риин Леего (Эстоний), «Финляндий - Россий» обществын координаторжо Симо Кантеле, Удмуртий гыч культура рӱдерын

директоржо Жанна Ермолаева да Марий Эл гыч централизованный клубный системын директоржо Василий Петров лийыныт.

Конкурсышто сеҥышын лӱмжым ты кечын нигӧ пален огыл, тудым Морко районысо Шоруньжа ялыште (2019 ийыште финн-угор

тӱнян культурный столицыже) «Сӱан йӱла» тӱнямбал кӱкшытан мероприятийыште увертарат.

Презентаций деч вара Мишкан гыч мийыше-влак мӧҥгӧ пӧртыл каеныт. Вет 15 июньышто Мишканыште Сабантуй пайрем. Районын представительжылан мыйым коденыт, вет тунам эше Мишкан ты конкурсышто сеҥа манын нигӧ ӱшанен огыл. Кастене журналист-влакым Марий Элын культура, печать да национальный политика министр Константин Иванов приниматлен.

14 июньышто ик эн кугу мероприятий - Шоруньжаште «Сӱан йӱла» пайрем эртен. Тушто уна-влакым вашлийме да пайремым

торжественно почмо деч вара жюри председатель Кяби Суви финн-угор тӱнян 2020 ийысе культура столицыжлан Мишканым ойырымо нерген увертарымыже мыланна, мишкан-влаклан гына огыл, а чумыр марий тӱнялан куанле увер лийын.

- Мишкан ден Морко район-влак иза-шольыла келшен илыме шотышто ойпидышым шукертак ыштеныт. Тугеже финн-угор тӱнян культур столицыже мемнан деч нигушкат огеш кай.

Ме Мишкан родына-влаклан чыла шотыштат полшаш тӱҥалына, - куанжым шылтыде каласен Марий Элын культура печать да национальный политика министрже Константин Иванов. Мыланем ты эстафетым символически налаш сценышке лекташ да Мишкан калык лӱм дене таушташ пернен. А столицын символжым, пу гыч ыштыме пӱркыт кайыкым, 2020 ий январь тылзыште Мишканыште столицым официально почмо годым кучыктат. Тиде мероприятийыш финн-угор тӱнян шуко регионжо гыч уна-влак погынат.

«Финн-угор тӱнян культурный столицыже» программа - Финн-угор калык-влакын молодежный ассоциаций (МАФУН) да «URALC калык-влакым вияҥдыме рӱдер» НКО-н пырля ямдылыме пашашт.

Программа финн-угор илыман регион-влаклан вияҥашышт полшаш, финн-угор калык-влакым да нунын йылмыштым моло-влаклан палдараш келыштаралтын.

Мутат уке, ты столица лӱмым налше верлан пашам чот ыштыман. Идалыкыште 12 кугу, тӱнямбал але Россий кӱкшытан культур мероприятийым эртарыман. Тушто финн-угор регионла гыч шуко уна-влак толаш тӱҥалыт.

Пресс-турын пытартыш кечыже - Йошкар-Олаште регион-влак кокласе Пеледыш пайрем. Ты кечын лу шагат эрдене чылан Ленин лӱмеш Культура дворец ончылан чумыргеныт, вара колонна дене рӱдӧ площадьыш - Шкетан театр деке каеныт. Колонным

тӱрлӧ регионла гыч мийыше карт кугыза-влак вуйлатеныт. Ты пайремыште Башкирий гыч Калтаса, Краснокам, Шаран районла гыч

фольклор коллектив-влак лийыныт. Пайрем кас марте шуйнен.

Валерий АБУКАЕВ.