Йоча-влак верч тыршат

Йоча-влак верч тыршат

Пагалыме «Келшымаш» газет редакций, ме, Кугу Соказа ялыште, Крупская лўмеш уремыште илыше-влак, газетда гоч Вячеслав Парсаевлан, Юрий Илинбаевлан да нунын ешыштлан чон гыч лекше тау мутым ойлена. Нуно верысе калыкым уремыштына йоча площадкым ышташ кумылаҥденыт. Чын лияш гын, тӱҥ пашажымат шкеак ыштеныт. Оксамат, утларакшым, шкеныштыным кучылтыныт. Пошкудо-влакат, конешне, полшеныт. Кӧ дыр чиям налын, кӧ дыр – цементым, молышт чиялтеныт...

Тыге чумыр вий дене пеш чапле йоча площадка кушкын шогалын. Тушто мунчалтыме курык, лӱҥгалтыш, карусель, футбол дене модмо пасу да моло улыт. Йоча-влак тушто кечымучко юарлен модыт, моло уремла гычат модаш толыт.

Ончыкыжым йоча площадка йыр печым печаш палемденна. Кызытеш пушеҥге, мотор пеледыш-влакым шынденна. Но пашам мучаш марте шукташ шагал огыл окса кӱлеш.

Верысе сельский поселений администраций вуйлатыше И. Айгузин эше кодшияк государство йоча площадкым ышташ 90 тӱжем теҥгем ойырымо нерген ойлен да тиде окса гыч ужашыжым мыланна ойыраш сӧрен. Но сӧрымӧ окса мемнан деке эше толын шуын огыл. Вучаш веле кодеш. Йодыш лектеш гын, 8-999-13-16-755 телефон дене йыгырташ йодына.

Кугу Соказа ялыште илыше-влак.

Серыш пурымеке, «Келшымаш» газет редакций Кугу Соказа сельсовет сельский поселений администраций вуйлатыше дене мутланен да йодышым рашемдаш йодын.

- Кугу Соказа сельский поселений администраций йоча площадкылан мландым межеватлен, тидлан 12 тӱжем теҥгем кучылтмо, - палдарен Игорь Альбертович. – Кугу Соказа ялын инициативный группыжо йоча площадкым кумдыкшым висен да тудым печаш меҥге, профиль-влакым, сеткым налаш йодмашым пуэн. Тӱзатыме пашалан окса пурен. Май мучаш – июль тӱҥалтыште 200 тӱжем теҥгелан (чылаже 500 тӱжем теҥге пурен) карьерный материал дене корным олмыктымо. Йоча площадкым тӱзатен пытыраш оксам ямдылыме, тиде паша лишыл жапыште мучаш марте шукталтеш.