Йоча-влак дистанционно тунемаш тӱҥалыт

Йоча-влак дистанционно тунемаш тӱҥалыт

Совещанийыште кок йодышым каҥашыме. Икымше «Подключение социальных карт школьника к АИС «Образование» йодыш почеш образований отделын гражданский оборона да чрезвычайный ситуаций шотышто специалистше Ю. Аликов выступатлен.

БР вуйлатышын пунчалже дене келшышын, 2020 ий 1 сентябрь гыч республикысе образовательный учреждений-влак школьникын картыжым эксплуатироватлыме системыш куснат. 11 школ вуйлатыше БРСК (Башкирский социальный карта регистр) системыште у социальный карта-влакым уже налын. 11 школышто СКУД (пурен-лекмым текшырыше система) – турникет вераҥдалтын. СКУД-влакым Монар да Пӱнчер ялласе школлаште вераҥдаш кодын. Тылеч вара 1-4 класслаште тунемше-влакым тугок пукшымаш организоватлалтеш. Тунемше-влакын картышт «Образований» АИС системыш («ELSCHOOL») ушалтеш. Тиде система дене РЦП-н методистше Ю. Аймурзина палдарен.

Кокымшо йодыш дистанционный йӧн дене туныктымаш нерген лийын. Тудын дене РЦПИ директор Н. Шамшиярова выступатлен.

2020 ий 2 апрель гыч районысо школ-влак йоча-влакым дистанционный йӧн дене туныктымашыш куснат. Тидлан кӧра туныктышо-влак каникул жапыште электронно-образовательный ресурс-влакым кучылтмо шотышто курсым эртышаш улыт.

1-4 классыште тунемше-влаклан, ача-ава-влакын, кудыштын пашам ыштымыштлан кӧра кечывалым икшывышт ончаш жапышт уке, кумылышт лиеш гын, школлаште 15 йоча марте кугытан посна группа-влак почылтыт.

- Дистанционный йӧн дене туныктымо шотышто йодыш пеш пӱсӧ. Районыштына чылаже 3113 йоча тунемеш. Школышто эртарыме мониторинг почеш, мыняр йоча тыгай йӧн дене тунем кертдымым рашемдыме. Эн неле ситуаций Кемий да Кӱшыл Шогертен ялласе школлаште, - палдарен Наталья Александровна. – Но йоча-влакым туныкташ йӧным ыштыде ок лий.

Гузель Низамовна тыгак ача-ава погынымаш-влакым эртараш кӱлмӧ нерген ойлен – ача-ава-влак мо лиймым да икшывышт кузе тунеммым пален да нуным эскерен шогышаш улыт.

Ешартыш йодыш почеш образований отделыш але районысо педагогический информаций рӱдерыш мийыман.

Татьяна ГОРДЕЕВА.