Ямле йўла ок мондалт

Кўшыл Шогертеныште Шорыкйолым палемденыт

Марий Шорыкйол кече кужемаш тўҥалме жап гыч тўҥалеш. Мишкан районышто тудо, ожсо йўла почеш, изарнян – кугарня водын пура. Тиде акрет булгар-влакын йўлашт дене кылдалтын. Нунын кечышт эрдене огыл, а кастене тўҥалын улмаш. Сандене Юл Булгарий воктене илыше ятыр калыкат тиде йӧныш куснен. А эрвел марий-влак кызытат монден огытыл.

Ожно Шорыкйол пайрем ўдырсий (ўдыр йўыш) гыч тўҥалын. Пайремын икымше кечыштыже ўдыр ден йоча-влак пєрт еда пура шолташ полтым да моло сийым поген лектыныт. Тидын годым чыла еҥымат У ий дене саламленыт да суапан илышым, тўрлӧ перкем тыланеныт. Тылеч вара самырык-влак Шорыкйол модыш пєртыш погыненыт да пайремым ыштеныт. Модмаш карт кугызан удылмо мутшо деч вара тўҥалын.

Кастене ял мучко Йўштӧ кува, Йўштӧ кугыза але Васли кува, Васли кугыза вуйлатыме дене мӧчӧр але савлай-влак кошташ тўҥалыныт. Нуно идалык могай лийшаш нерген ойленыт, вольык перкем тыланеныт. Тидын годымак озанлыкым тергеныт, сай сурт оза ден озаватым моктеныт, йогыракым вурсеныт… Кажне суртышто нуным вашлияш ончылгоч ямдылалтыныт, уна-влакым сайын сийлаш тыршеныт, пўкшым ямдыленыт.

Пайрем арня мучко кастене веле огыл, кечывалымат шуйнен. Еҥ-влак, ийгот шотышто пєлалтын, икмыняр пӧртыштӧ пайремленыт.

Кўшыл Шогертен ялыште ожсо йўлам кызытат тўткын арален илат. Ялысе билиотекыштат тиде пайрем лўмеш идалык еда посна мероприятий эртаралтеш. Теният ямле пайремым эртарыме. Ондак библиотекарь Светлана Мишингина пайремыш толшо йоча-влакым йўлан историйже дене палдарен, тудын мланде паша дене кылдалтмыжым умылтарен. Ожно икымше пайрем эрдене чыланат идымышкышт лектыныт да лум гыч ора-влакым ыштеныт. Калык ўшанен, ора мыняре шукырак да кугырак лиеш, шурно тунаре чот ума.

Палдарымаш деч вара йоча-влак тўрлє йомартле модыш дене модыныт: «Сокыртага», «Чарак гоч вончымаш», «Мужыр дене погынымаш», пўкен йыр куштымаш...

Пайрем йомартлын, ямлын да оҥайын эртен.

С. МИШИНГИНА.